Ikasturtea hasi dugun honetan LOMCEk bere aplikazioaren ibilbideari ekin dio. Legeak, hasieratik jaso bezala, urratsez urratseko aplikazioa izango du. Hego Euskal Herrian aplikazioa hezkuntza sailburuen eskutik dator, Iribasek Nafarroan nafar erara gauzatzen ari da eta Uriartek Erkidego Autonomikoan zehaztapen askorik gabe legeak jasotzen dituen hainbat aldaketa abian ditu, esaterako ingurune ikasgaia bera.
C.Uriartek berriki adierazi du hezkuntza sailaren egitekoa titulazioa akreditatzea dela baina hezkuntza komunitateak behin baino gehiagotan Lomcea ez aplikatzeko eskatu dio. Zer egingo du eskakizun honen aurrean? Norabide horretan lehen urratsa, LOMCEa ez aplikatuta, gure ikasleen titulazioak homologatzeko lanari ekitea dela deritzogu. Zerbait egingo du? Ze pausu emango ditu?
Hasieran, Heziberrik LOMCEa geldiaraziko zuen tresna izan behar zuen, gerora ideia hau Uriartek berak baztertu zuen. Eta orain zein da bidea? Hurrengo asteotan, Hezkuntza Sailak kaleratu beharreko dekretu curricularrarekin, ikusiko dugu Heziberri 2020-k hezkuntza sistema propioaren norabidean urratsa den ala LOMCEaren bidetik, horren egokitzapena baino ez den. Nafarroan “napar” erara egite horrek curriculum dekretuaren %90 lege organikoan du oinarri. Hori al da bidea? UPNk Nafarroan hartutako bidea al da PNVk erkidego autonomikoan jorratuko duena?
Hezkuntzak ataka garrantzitsua bizi du, LABentzat ataka honek eraiki nahi dugun alternatiban sakontzeko eta ekiteko une garrantzitsua bilakatu dezakegu eta horretan ari gara.
Bide batez, Abortoaren legea aurrera ez ateratzeko arrazoiak LOMCE legearekin alderatzerik dago, biek jendartean duten babes ezagatik, besteak beste. Hortaz, Werten dimisioa eskatzearekin batera, Euskal Herriak bere hezkuntza sistema propioa garatu ahal izateko inplikatuak gauden eragile guztion artean burujabetza ariketa egitea proposatzen dugu.