Lezoko Bekoerrota eta Altzateko kiroldegiko langileek zentroko lehen lan ituna izatea lortu du LABek. Langileen lan baldintzak hobetzeaz gainera, galdutako erosmen ahalmena berreskuratu dute. Lorpen hau oso positibotzat jotzen dugu, langileen lan-baldintzak duintzen dituen akordioa lortu dugulako.
4 urte eta 9 hilabetetarako akordioa lortu da, honako baldintzak barne bilduta:
– Langileen arteko desoreka gaindituta. Langile guztiei aplikagarri izanen zaie Gipuzkoako Titulartasun Publikoko Kirol-Instalazioen hitzarmena, honela egun langileek bizi duten arrakala gaindituz.
Baldintza hori ezinbestekoa dela uste dugu; izan ere, baldintza horrekin, Udalak, enpresen konplizitatearekin, ezin izango du Gipuzkoako Lokalen, Ikuskizunen eta Kirolen hitzarmena aplikatzen jarraitu. Hitzarmen honen bidez, langile askoren lan-baldintzak gehiago pobretzen ziren, eta lehen eta bigarren mailako langileak betikotzen ziren. Hau gainditzea lortu dugu, langileen arteko arrakala gainditzea da, guztien lan baldintzak homologatuz.
– Soldata igoerak. Langile ororentzat, 2022 maiatzaren 1etik 2026. urtera arte, soldata igoera KPI+%1 izango da. Honez gain, 2026. urteko urtarrilak 1erako soldataren igoera %20koa ez bada, 2026ko urtarrilaren 1etik aurrera 2026. urterako aurreikusitako soldata igoera gaindituko da, %20ko soldata igoera lortzeko.
Baldintza honek, langile orok igoera nabarmena izateaz gainera, 10 urteetan galdutako eros ahamena berreskuratzea ahalbideratzen die. Gainera, urtero KPIaren igoera bermatzea lortu dugu, soldatak KPIaren arabera eguneratzearen garrantzia nabarmenduz, honako neurria beharrezkoa baita, langileen pobretzea saihesteko.
– Lizentziak. Norberaren gauzak egiteko ordaindutako baimen egun bat.
– Aldi baterako ezintasunak. Ezintasun guztietarako, enpresak soldata errealaren %100eraino konpentsatuko ditu langileak, ordainsariak barne.
Honez gain, hitzarmen honetan xedatzen ez diren lan baldintza oro, Gipuzkoako Titulartasun Publikoko Kirol- Instalazioen hitzarmenak xedatuko ditu.
Hitzarmenarekin lortutako baldintzak ezinbestekotzat jotzen ditugu, langile hauek bizi duten prekarizazioa gainditzeko hastapen pausuak direlako.
Azkenik, Lezoko Bekoerrota eta Altzateko langileak zoriondu nahiko genituzke LABetik, egindako borrokaren ondorioz garaipena lortu dutelako.