Prekaritateak langileak hiltzen dituela eta lan heriotzak salatzeko, LAB, ELA, ESK, STEILAS, Etxalde eta Hiru sindikatuok manifestazio bana egin dugu Bilbon eta Iruñean, Lan Segurtasun eta Osasunaren Nazioarteko Egunean, eta lore eskaintza banarekin omendu ditugu hildako langileak. LABetik ere Donibane Lohizunen egin dugu elkarretaratzea, Ipar Euskal Herriko zenbait sindikaturekin batera.
Murrizketen eta Covidaren ondorioz lan jarduerak behera egin duen arren, Hego Euskal Herrian lan ezbeharren kopuruak gora egiten jarraitzen du, modu kezkagarrian: 2021ean %10,2ko igoera izan da EAEn eta %16,7koa Nafarroan. Iaz, gutxienez, 68 langile hil ziren lanean, 48 EAEn eta 20 Nafarroan, eta aurten jada 20 langile hil dira Hego Euskal Herrian, 17 EAEn eta 3 Nafarroan.
Lan gaixotasunei dagokionez, azpi erregistroa salatzen jarraitzen dugu estatistika ofizialetan. Hego Euskal Herrian bakarrik, gutxienez, 17 pertsona hil dira amiantoarekin lotutako gaixotasunen ondorioz, esaterako.
Mutualitateak eta enpresak dira egoera horren erantzule nagusiak. Prebentzio zerbitzuen eta mutualitateen jardunbide txarren aurrean, baina, erakundeek ez dute behar besteko kontrol eta neurririk hartzen. Giza baliabide gehiago behar dira, bikoiztu behar dira inspektoreak, esaterako.
Horregatik, kaleetan aldarrikatu dugu lanak gaixotzen eta hiltzen jarraitzen duela, eta prebentzio neurriak bermatu ezean, milaka langilek jarraituko dute behar besteko babesik gabe; bereziki, prekarioen daudenak.
