Gipuzkoako Foru Aldundiak Gabonetako aparteko pagaren inguruan hartutako erabakiarekin erakutsi du langileen eskubideak behin eta berriro urratzen dituzten erabaki inposatuen aurrean gure erabaki propioak hartzeko premia dagoela eta horretarako prestutasuna duela.

Gabonetako aparteko pagaren afera honetan jokoan dagoena ez da soilik 14. paga, Madrildik inposatutako murrizketen aurrean zein bide hartu, baizik. Afera horrek lehen mailako gatazka poilitiko bat uzten du agerian: Euskal Herriak behar duen sektore publikoa, herri honek behar dituen zerbitzu publikoen eskaintza gauzatu eta bertako langile publikoen eskubideak arautzeko eskumen falta. Berriro diogu, eremu honetan eman beharreko bataila nagusia ez dela juridikoa, politikoa baizik.

Aldundiak hartutako erabakia garrantzitsua da, burujabetza ariketa bat delako; erabaki horrekin krisiaren aurrean Euskal Herriak hartu behar duen bidean aurrera urratsa eman da. Bide hori aldarrikatu dugu, bide hori beharrezkoa dugu, burujabetzaren bidean aurrera egitean baitago krisiari konponbidea eraikitzeko aukera.

Eragile sindikal eta sozialak aldarrikatu dugun bidea da, gure esku dago bide hau indartzeko, zabaltzeko eta azken bururaino emateko akordioak eta aliantzak eraikitzea.

 

ERLAZIONATUTAKO ARTIKULUAKIDAZLEAREN GEHIAGO