2025-05-14
HomeEkintza SindikalaGreba Feminista Orokorra prestatzeko martxan gaude

Greba Feminista Orokorra prestatzeko martxan gaude

Oiartzungo Landetxe aretoan 200 emakumetik* gora bildu gara, azaroaren 30erako deitutako hitzordua ortzimugan. Zaintza Sistema publiko komunitarioa eratzeko beharrari jarri diogu azpimarra; datorren astetik aurrera eskualde guztietan delegatuen batzarrak  egingo ditu LABek norabide berean.

Goizean bideo emanaldi batekin hasi da batzarra, eta LABek sindikatu feministara bidean orain arte egindakoak errepasatu ostean, zaintza eremuko eta lanbide feminizatuetako hainbat langilek aurrera eramandako borroken testigantzak eta jomugan dituzten aldarrikapen nagusiak partekatu dituzte. “Premiazkoa da egungo zaintza sistema iraultzea”; horixe izan da ondorio nagusietakoa.

Ostean, Oiartzunera bertaratutakook lantaldeetan jorratu ditugu grebara begirako eman beharreko urratsak, eta Zutik emakumeak abestiarekin itxi dugu gaurko hitzordua.

Mugimendu Feministak azaroaren 30erako deitutako Greba Feminista Orokorrarekin bat egin eta prestaketa lanetan buru-belarri murgildu gara LAB sindikatuan. Izan ere, zaintzarena sindikatuaren erronka nagusietakoa da, Garbiñe Aranburu koordinatzaile orokorrak nabarmendu duenez: “Zaintza krisia gero eta nabariagoa da. Krisi honen arrazoi nagusi eta bakarra ez da bilakaera demografikoa edo jendartearen zahartzea. Emakumeok* errebelatzen ari gara, ez dugu ontzat ematen zaintza eredu hau, bidegabea eta sostengaezina baita. Egoera jasanezin bilakatzen ari da emakumeontzat* eta bereziki emakume langile migratu eta arrazializatuentzat”.

Hala, Aranburuk nabarmendu du premiazkoa dela zaintza lanak berrantolatu eta modu orekatuagoan banatzea; hain zuzen ere, hori du helburu LABek defendatzen duen zaintza sistema publiko komunitarioak, “zaintza lanak eremu pribatutik atera eta duintzea lortzeko” Aranbururen esanetan.

LAB sindikatuak denbora darama Mugimendu Feministarekin eskuz esku lanean eta aliantzak eraikitzen, eta bete-betean murgilduko da Greba Feminista Orokorraren lanketan.

AZKEN ALBISTEAK | ÚLTIMAS NOTICIAS

Confebasken aurkako epaiketa egin dute, kimika sektoreko negoziazio kolektiboan fede txarra izateagatik

2023az geroztik, LAB, ELA eta UGT sindikatuok mahai bat irekitzeko eskatzen ari gara, EAEko sektoreko 17.000 langileen baldintzak hemen finkatuko dituen hitzarmen bat negoziatzeko.

Bizkaiko Ur Partzuergoko azpikontratetako langileak kolektiboki antolatzen eta borrokatzen hasi dira

Acciona, Sacyr, Fcc Aqualia, Gestagua, Inaraqua, Cadagua enpresek, beste askoren artean, prekarizatu egiten dituztela azpimarratu dute langileek. Hitzarmenen negoziazioak blokeatzearen, azpikontraten arteko arrakaletan sakontzearen edota hitzarmen estatalak aplikatzearen errudunak dira.
00:01:15

Funtzio publikoan greba egin dute Ipar Euskal Herrian, lan baldintza eta zerbitzu publiko duinen alde

Greba eguna Ipar Euskal Herrian, funtzio publikoan. Kolektibitateetako, administrazioko, irakaskuntzako, medikuntzako langileak… Karrikan izan dira, lan baldintza eta zerbitzu publiko duinen alde.