LABek balorazio negatiboa egin dio ZF Aftermarket enpresarekin gehiengo sozialak sinatutako aldi baterako enplegu-erregulazioko espedienteari, eta uste du akordio horrek sindikatu sinatzaileen enpresarekiko ‘konfiantza itsua’ islatzen duela. Sindikatuaren arabera, espedienteak ez du etorkizuneko bermerik eta ez ditu langileak behar bezala babesten.
Aldi baterako enplegu-erregulazioko espedientea produkzio eta antolakuntza arrazoiengatik aurkeztu zen, baina LABek salatu duenez, “lehen egunetik, enpresak proposatutako konponbide bakarra Txinako plantara produkzioa ateratzea izan da, produktiboago izateko”. Sindikatuak salatzen du ez dela beste proposamenik egin, nahiz eta ordezkariek aho batez eskatu enpresari.
Sindikatuak adierazi duenez, enpresak “ez du etorkizunerako edo bideragarritasunerako planik aurkeztu, argudiatuz sei astetik harago ezin dutela ezer aurreikusi, ez produkzio, ez inbertsio, ez berme aldetik”, eta hori guztia kontraesanean dago, LABen ustez, “urtebeterako espedientea justifikatzen saiatzen ari direnean”.
LABek kritikatu du 2023ko kontu auditatuen ondoren, enpresa taldeak dibidenduak banatu arren, “ez direla %100eko soldata osagarriak sinatu kaltetutako langileentzat”. Sindikatuaren arabera, ia urte osoa emango dute langile batzuk erregulazioarekin, eta horrek kalte nabaria ekarriko die haien langabeziari, sinatutako egutegiaren arabera.
Sindikatuak zalantzan jarri du zenbait sindikatuen jarrera, “sinatutakoa publikoki goraipatu dute eta lanpostuen bermetzea lortu dutela esan dute, egia ez denean”. Hori ikusita, LABek ez du akordioa sinatu, nahiz eta negoziazioetan azken momenturarte proposamenak aurkeztu dituen.
Azken bileran, hasieratik sindikatu guztiek adostutako mugak ez zirela bete salatu du LABek. Sindikatuaren esanetan, orduak igaro ahala, muga guztiak gainditzen joan ziren, azkenik sindikatu batzuk enpresak aurkeztutako guztia sinatzeko prest zeudelarik.
Hortaz, LABek balorazio negatiboa egin dio espedientari, “enpresaren etorkizuna kontuan hartu gabe adostu” delako, eta bestelako kasuak gogorarazi ditu, hala nola Berrioplanoko MOVINORD edo Esquirozeko BSH, non, aldi baterako enplegu-erregulazioko espedienteak ondorio latzak izan dituzten.