2023-11-28
HomeZerbitzu PublikoakZerbitzu SoziokomunitarioaLABek, Gasteizko Gizarte Larrialdien Udal Zerbitzuan egin diren bi kaleratze bidegabekoak salatzen...

LABek, Gasteizko Gizarte Larrialdien Udal Zerbitzuan egin diren bi kaleratze bidegabekoak salatzen ditu

Pasa den abenduaren 28an, Asociación para el Desarrollo Proyecto Intervención Social-BETA delakoak, Gasteizko Gizarte Larrialdien Udal Zerbitzuaren kudeaketa eramaten duen enpresak, zerbitzu publiko honetan luzez aritu diren bi langile kaleratu zituen. LABen iritziz bi kaleratze hauek erabat bidegabekoak dira; izan ere, ez dago inolako arrazoirik horrelako neurri bat hartzeko: alde batetik, zerbitzuan ez da eman aldaketa ekonomiko ez organizatiborik; eta bestaldetik, enpresak berak ere ez die langileei ezer leporatzen horrelako neurri gogorra eta irtenbiderik gabekoa aurrera eramatea justifikatuko lukeenik.

Langileei emandako idazkian, enpresak BETAk kudeatzen zituen bi zerbitzuak (bi langile kaleratuak lan egiten zuten Gizarte larrialdietarako zerbitzua batetik, eta Genero indarkeriaren biktimentzako berehalako harrerarako zentroa bestetik) bi konkurtso ezberdinetan ateratzeko erabakiarekin lotzen ditu enpresak bi kaleratze hauek. Baina praktikan Udalak hartutako erabaki horiek ez dute inolako eraginik Larrialdietarako zerbitzuan lan egiten zuten langileengan. Izan ere, BETAri eman diote berriz ere kontrato hori, eta gainera, orain arteko baldintza berdinetan.

Are gehiago. Bi zerbitzu horietan bi langileen ekipo berezituak lan egin izan dute, nahiz eta biak BETA enpresaren menpe egon. Beraz, kaleratutako bi langileen lanpostuak berdin jarraitzen dute: ez da murrizketarik egon (ez orduak, ez pertsonalgoa, ez dirua). Zer dela-eta enpresak bi langile hauek kaleratzea erabaki du? Gure aldetik ez dago zalantzarik: arrazoi ekonomiko hutsa izan da. BETAk ez du kontutan hartu langile hauen ibilbide profesionala, Larrialdietarako Zerbitzuan eskuratu duten esperientzia… eta “merkeen” aterako zaizkien kaleratzeak erabaki dituzte. Eta gainera, ez dute inolako sentikortasunik erakutsi bi langile hauekiko, guztiz bestelakoa izan da enpresaren jarrera, bi langileak kaleratze merke eta garantiarik gabeak onartzeko presionatu ditu, eta haien kaleratzeen kostuen ardura haiei leporatzen saiatu dira.

Baina enpresaz haratako, LABek Erakunde publikoak ere salatu nahi ditu, zerbitzu bat esku pribatuetan uzten dutenean erakusten duten pasibotasuna eta enpresetan lehenesten diren irizpide ekonomizisten aurrean. Kasu honetan BETA izan da bi langileak kaleratzeko erabakia hartu duena, baina finean Gasteizko Udalak zerbitzu horien kontura hartu dituen erabakiak izan dira BETAri hori egiteko aukera eman diotenak. Horren ostean, Udalak ez du inolako bitartekorik jartzen %100ean erakunde horren erabaki ekonomikoen menpe dauden zerbitzuetan aritzen diren langileen eskubideak bermatzeko.

Zerbitzu hauek erabat publikoak dira: arreta ematen dieten egoera larriengatik eta horietara jotzera behartuta sentitzen diren giza kolektiboen izaera sensiblearengatik. Gure iritzian zerbitzu horiek zuzenean Administrazioak kudeatu beharko lituzke, horrek bertan erabiltzen den diru publikoa eta herritarrei ematen dieten zerbitzuaren kalitatea kontrolatzeko aukera bakarra hori delako. Edozelan ere, Udalak zerbitzu horiek esku pribatuetan uztea erabakitzen badu ere, horrek ez du esan nahi bi langileen bidegabeko kaleratzeak bezalako egoera larrien aurrean Udalak eskuak garbitzea.
 

 

 

AZKEN ALBISTEAK | ĂšLTIMAS NOTICIAS

Azken hilabetean Palestinako Gazan eta Cisjordanian Israeldar gobernuak eragin duen sarraskia salatu dute Bizkaiko suhiltzaileek

Basauriko Suhiltzaile talde batek sortu duen dinamikari esker, eta honi jarraipena emonez, Palestinako herriari elkartasuna erakutsi diote. Horretarako, aste honetan Artaza, Urioste eta Iurretako parkeetan kontzentrazioak egin dituzte. Sirenekin minutu bateko dolua eta elkartasuna islatu dute suhiltzaileek.

Iruñeko Udaleko Lan Kontratudunen Komiteak eskatu du Etxeko Laguntza Zerbitzua erabat munizipala izatea

Azaroaren 30ean, koordinadora feministak zaintza-eskubideen aldeko greba orokorrerako deia egin du. Grebaren aldarrikapen nagusiak hauexek dira: zaintza-sistema publiko komunitario bat lortzea eta zaintza-sektorearen lan baldintzak duintzea eta babestea, bizitzak erdigunean jarrita.

Artabiako Arneactive enpresako langileek lau orduko lanuztea eginen dute lan baldintzak hobetzearen alde

Artabiako (Nafarroa Garaia) Arneactive enpresako langileek bihar, asteazkena, azaroak 29, lau orduko lan-uztea eginen dute, 12:00etatik 16:00etara, KPIaren araberako soldata-igoerak eskatzeko, kategoria hobetzeko aukera errealak eskatzeko eta plantillaren iritzia kontuan har dezaten eskatzeko.