Bilboko Udalak, itxuraz “munduko alkaterik onena” duenak, hiriko garraio publikoaren kalitatea okertuko du, zerbitzuko erabiltzaileen iritzia edo autobus zerbitzuaren erabilera kontuan hartu gabe, nahiz eta hiriko autobusaren eskaerak azkenengo urteotan gora egin duela jakinda. Neurri honek, Metro Bilbaok egindakoarekin batera, Bilboko garraio publikoan nahaspila sor daitekeela esan nahi du.

Udalbatzak aurkeztu duen ikerketa eta proposamenak bi urteko epea izango du, 2013 eta 2014an zehar luzatuz. Egia da oraindik ez dakigula teknikoki zelan izango diren aldaketak, baina azkenean, zerbitzuen murrizketak izango dira nagusi. Hau guztia kontuan hartuta, Bilbobuseko eskaera %4 igo arren (bilbotarrok gero eta gehiago erabiltzen dugu hiriko autobusa), Udalak zerbitzua okertzea erabakitzen du honako ondorioekin;

1. Garraio publikoaren zerbitzuak okerrera egitea, autobusen arteko maiztasunak luzatuko dira. Horrek esan nahi du Bilbobuseko erabiltzaileek denbora gehiago itxaron beharko dutela markesinetan autobusa hartzeko. Honekin batera, autobusak euren edukiaren mugan izango direla jasan beharko dute. Honen ondorioz une batzuetan ezin izango da autobusera igo, eta hurrengoa heldu arte itxaron beharko da. Gainera, beranduago helduko da murrizketei esker.

2. Ibilgailu pribatua, kotxea, gehiago erabiliko da, zerbitzuaren txartzeak auto pribatuaren erabilera igoera ekarriko ondorio bezala. Beraz, Udalak ibilgailu partikularraren erabilerari lehentasuna ematen dio garraio kolektiboaren kontra.

3. Langabezia gehitzea, "munduko alkaterik onenak" langabezian dagoen pertsona kopurua gehitzea lortuko du, planteatzen dituzten murrizketek lanpostu-desagertzea eragingo dute, hau da, langile gehiago langabeziako bulegoetara.

Gaur egun, gai honi buruz eztabaidatzeko, Bilbobuseko Enpresa Batzordea eta Udalaren arteko hainbat bilera burutu dira. Bilera hauetan Enpresa Batzordeko atal batek murrizketak onartu ditu eta negoziatzea saiatzen ari dira. LAB sindikatua ez dago zerbitzuaren inolako murrizketarik negoziatzeko prest, honek hiriko garraio publiko zerbitzuaren txarrera jotzea esan nahi duelako. Ez dugu inongo lanposturen amortizaziorik onartuko ere.

Hau guztia dela eta, LABek hiri garraioen eremuan arazo ekonomiko guztien konponbidea izan litzatekeenaren aurrean Udala entzungor egiten ari dela adierazi nahi du:

1. Erakundeak Bilbobuseko kontzesioa berehala erreskatatu behar izango luke, horrela, bitartekariak kenduz, orain falta zaien dirua aurreztuko lukete. LABek neurri hau aspaldi planteatu zuen, baita Herri-Kontuen Euskal Epaitegiak ere, bere 2009ko txostenean.

2. Udalak ziurta dezala, Artxanda eta Santa Marina Ospitaleko lineak kentzeko erabakiaren gainean, Bizkaibuseko emate berrien aurreikusitako proiektuan, Bilbobus izan dadin Artxanda eta Santa Marinako lineak ustiatzen dituena, euren desagerpena saihesteko.

Neurri hauek, egungo egoera ekonomikoa saihestu eta langileriaren egonkortasuna ere bermatuko luketenak, hainbat aldiz eraman dira Bilboko Udalara bilera ezberdinetan. Eurek entzungor egin dute, Bilbobuseko errentagarritasunak hiritarrei zerbitzua ematea baino gehiago kezkatzen dielako. 

 

LAB SAREAN
{module[111]}