2024-04-15
HomeZerbitzu PublikoakOsasungintzaLAB Osakidetzako Mahai Sektorialetik altxatuko da

LAB Osakidetzako Mahai Sektorialetik altxatuko da

Datorren astelehenerako, martxoaren 21ean, Osakidetzako Mahai Sektorialaren batzarra deituta dago. LAB sindikatuak salatu nahi du Osakidetzako Zuzendaritzak deialdiak egiteko orduan ez dituela gutxienekoak errespetatzen. Ezin dugu onartu deialdia bilera baino hiru egun lehenago jasotzea, gai ordenik gabe eta dokumentazioa ere bidali gabe. 

Argi dago Osakidetzako Zuzendaritzaren helburu bakarra bere irudi publikoa hobetzea baino ez dela, negoziatzeko borondatearen gaineko plantak egiten. Hauteskunde autonomikoen atarian, EAJ alderdiak urte hauetan osasun publikoan burutu dituen murrizketak eta pribatizazioaren aldeko erabakiak ahantzarazi nahi ditu.

Hala ere, LABek negoziazioaren alde egiten jarraitzen du, hori bai, gutxieneko baldintzak eta bermeak ematen badira. Osakidetzak “negoziazio kolektiboa” aipatzen du bere deialdian, baina gaur egun ez dago horrelakorik. Osakidetzak erabakitzen du zertaz negoziatu behar dugun, noraino, noiz eta nola. Hau gutxi balitz, fundamentu gutxiko deialdi hauek langile zein ordezkari sindikalekiko errespetu faltaren adierazle dira. Ez badira gai gai-ordena serio eta adostua lortzeko, zer nolako sasi negoziazio burutuko dugu?

Beraz, asteleheneko batzarrean, LABek negoziatzeko 5 puntuko proposamena helaraziko dio Osakidetzari mahaitik altxatu baino lehen. Puntu horien gaineko benetako negoziazioa exijitzen dugu, adostutako egutegi baten arabera eta gutxieneko baldintzak bermatzen dituen deialdiekin.
Ez da asko eskatzen duguna. Espero dezagun hurrengo deialdirako Osakidetzako Zuzendaritzak gai honek eskatzen duen seriotasunez erantzutea, milaka eta milaka langile eta osasun publikoaren sistemaz ari baikara.
 

 

 


AZKEN ALBISTEAK | ĂšLTIMAS NOTICIAS

Bizkaiko esku hartze sozialeko langileek hiru eguneko baraualdiari ekin diote Foru Aldundiaren aurrean

Ekimen honetaz gain, greba eguna deitu dugu LAB eta ESKk apirilaren 17rako, Bizkaiko esku hartze sozialeko hitzarmenaren alde.

50. urteurrenaren harira, Maiatzaren Lehenean manifestazio eta jaialdi nazionala antolatu ditugu Iruñean

LABen 50.urtemugako ospakizun betean dator aurtengo Maiatzaren Lehena. Une gozoa da sindikatuarentzat, zalantzarik ez. Hala ere, ez diogu gure bilakaerari bakarrik begiratzen. Gure misioa langileen lan eta bizi baldintzen alde borrokatzea da, eraldaketa soziala eta aldaketa politikoak eragitea.

Intersindikalarekin mobilizatuko da LAB Maiatzaren Lehenean Baionan, bazterketa gaindituz

Prentsaurrekoa egin dugu Baionako Merkatuan LAB, CFDT, CGT, UNSA, FSU eta Solidaires sindikatuok aurtengo Maiatzaren Lehenean bertan egingo den manifestazioa iragartzeko. Bertan izan da Argitxu Dufau Ipar Euskal Herriko bozeramailea, izan ere, aurten LAB intersindikalarekin batera mobilizatuko gara langileen egunean, urte luzez pairatu behar izan dugun bazterketa gaindituz.