LABeko Bizkaiko Metalgintzako delegatuek asanblada eta manifestazioa egin dute gaur, hilak 18, Bilbon “Murrizketarik gabeko metalgintzako hitzarmenaren alde. Eusko Jaurlaritza patronalaren morroi!” lemapean. Gran Via zeharkatuz, Eusko Jaurlaritzaren egoitzaren parean amaitu da protesta. Bertan Ainhoa Etxaide, LABeko Idazkari Nagusiak, azaldu du Jaurlaritzak bere egin duela lan erreformaren printzipio nagusia, hau da, politika lan merkatutik atera eta langileak bakar bakarrik uztea patronalaren esku. Hori bera egin dute metaleko hitzarmenarekin, “patronalak ez du hitzarmenik nahi eta Jaurlaritzak jarrera hori nagusitzen utzi du”.

Horrez gain Etxaidek salatu du “industria suntsitzen eta Euskal Herritik kanpo eramaten ari badira neurri handi batean lan erreforma honi esker dela, ez zaielako ezer kostatzen lan postuak suntsitzea”. Azken batean patronalak honelako neurriak hartzeak ez baitauka inolako kalte ordainik.

Azkenik “hitzarmenak txikitzea da prekarietatea neurririk gabe zabaltzen uztea da” Etxaideren ustez. Hau patronalaren borondate eta erabakietatik haratago doa, Jaurlaritzak bere politikarekin babesten baititu. LABek ez dauka inolako asmorik patronala edo Jaurlaritzaren jarrerari begira egoteko. Guk enpresaz enpresa gatazkak pizten jarraituko dugu eta gatazka horien gainean proposamenak egingo ditugu. Hori da orain tokatzen dena, borroka egin eta langileei alternatibak proposatzea.