Atzo bildu zen EAEko Osasun Itunaren “Lankidetza Publiko-Pribatua” lantaldea, bertako kideek hala eskatuta, Osasun Sailak aurretik adostutako helburu bat aldebakarrez aldatzeko saiakera egin ostean.
Zoritxarrez, bilera horretan berriro ere agerian geratu zen adostasunik ez dagoela oinarrizkotzat jotzen dugun eta talde honek gehiengoz onartu zuen zerbaitetan: euskal osasun sistema publikoa indartzea zerbitzua baliabide publiko eta propioen bidez ematea lehenetsiz, sektore pribatuarekiko menpekotasuna gutxituz pixkanaka, eta herritarra erdigunean jarriz.
Erabat gaitzesten dugu taldeak adostutako proposamenak alde batera uztea edo ordezkatzea, soilik Jaurlaritzaren edo Confebasken interesekoak ez direlako. Adibidez, lantaldearen atzoko bileran, talde horretan landu gabeko proposamen bat onartzea behartu zuten, Osasun Sailaren aldebakarreko proposamena zena.
Uste dugu Osasun Itunaren prozesua oso une delikatura iritsi dela, eta orain, inoiz baino gehiago, pribatizazioa murrizteko eta osasun-sistema publikoaren autosufizientzia berreskuratzeko konpromisoa Itunak argi jasotzea dagokigula.
Horregatik, orain arte egindako lan eskergarekin koherenteak eta arduratsuak izanik, prest jarraitzen dugu Osakidetza publikoa eta kalitatezkoa indartzeko ekimenak bultzatzeko.
Beraz, orain hasten den zuzenketa-fasean, pribatizazioaren eraginak geldiaraziko dituzten neurriak biltzeko ahalegin guztia egingo dugu, sistemaren benetako publifikaziorantz aurrera egiteko eta erabaki zehatzak jaso daitezen, analisi iragankorretatik, topikoetatik eta benetako konpromisoen falta duten diskurtso hutsetatik harago.