Enpresaren bezero nagusi diren Vocentori eta Iberdrolari erantzukizuna exijituko diete.
Gueñesen kokatuta dagoen Konekta BTO telemarketin enpresako langileek salatzen dute enpresa ezkutuko Enplegu Erregulazio Espediente (EEE) bat egiten ari dela, eta horrek 13 langile kaleratzea ekarri duela azken 2 hilabeteetan.
Gueñeseko lantokiak 4 bezero ditu, eta horietako bik, Vocentok eta Iberdrolak, lanaren %95 baino gehiago egiten dute. Konekta BTOk 275 langile ditu Gueñesen, eta horietatik %80 baino gehiago emakumeak dira. Hau ez da kasualitatea, prekaritate laborala eta telemarketin sektorearen feminizazioa baliatzen dituen enpresa-politika baten emaitza baizik. Konekta BTOko langile gehienek lanaldi partzialeko kontratuak dituzte, eta horrek ezegonkortasun eta zaurgarritasun egoeran uzten ditu.
Kaleratzeak tantaka
Aurtengo ekainaren 1etik, Konekta BTOk 13 langile kaleratu ditu pixkanaka. Bi hilabete eskasean, Vocentoren kanpainako 7 langile eta Iberdrolaren kanpainako 6 langile kaleratu dituzte.
Iberdrolaren kasuan, diziplina-arrazoiak argudiatu ditu enpresak edo aldi baterako ezintasun-egoeran zeuden langileak kaleratu ditu.
Vocentoren kasuan, kaleratzeak “lan-bolumenaren murrizketa” batek justifikatu ditu. Gaur egun, enpresak enplegua suntsitzen jarraitzeko mehatxua egiten du, Vocentok hala eskatuta, zerbitzua %20 murriztu nahi baitu.
Salaketa eta mobilizazioak
Konekta BTOko langileek salatu dute hau ezkutuko EEE bat dela eta enpresak kaleratutako langileak lantoki berean birkokatu ditzakeela, bezeroak artatzen jarraitzen baitu eta deiak ez baitira falta. Konekta BTOk eta bere bezeroek, Vocentok eta Iberdrolak, enplegu duina mantentzeko borondaterik ez izatea da kaleratze horien atzean dagoena.
Konekta BTOk, Vocentok eta Iberdrolak langileen eskubideekiko erabateko mespretxua erakusten dute. Enpresa horiek beren etekin ekonomikoak lehenesten dituzte guztiaren gainetik, baita beren langileen ongizatearen eta duintasunaren gainetik ere. Konekta BTOko kaleratzeak ez dira arazo isolatu bat, baizik eta irabaziak maximizatzea bilatzen duen enpresa-politika baten emaitza, prekaritate laboralaren eta enplegu-suntsiketaren kontura. Beren erantzukizuna beren gain har dezatela eta langile guztientzako enplegu duina eta egonkorra berma dezatela eskatzen diete langileek enpresei.
Egoera hori salatzeko, Konekta BTOko enpresa batzordeak bi lanuzte egun deitu ditu abuztuaren 11rako eta 17rako, ekainean eta uztailean egindako lau lanuzte egunen ondoren datozenak. Hiru ordutako lanuzteak izango dira egun bakoitzean, 11:00etatik 14:00etara.
Abuztuaren 11n, 12:00etatik 12:30era, El Correo-ren egoitzaren aurrean elkarretaratuko dira Bilbon (Kale Nagusia, 45), Konekta BTOren bezero honen aurrean ezkutuko EEE hau ez dutela onartuko salatzeko, ekainaren 24an Iberdrola dorrearen aurrean egin zuten bezala.