2026-11-16
HomeEkintza SindikalaLan baldintzek hil egiten dute

Lan baldintzek hil egiten dute

Gaur jakin dugu, atzo, Azkoitian gertatutako lan istripu traumatiko batean, 44 urteko J.A.A.T. basogintzako langilea hil zela, lanean ari zela enbor bat gainera erori ostean. Azken honekin, gutxienez 39 langile hil dira aurten Euskal Herrian lan istripuz.

LABetik elkartasuna eta babesa helarazi nahi dizkiegu Azkoitian lan istripuan hildako basogintzako langilearen senide, lagun eta lankideei. Era berean, elkartasun hori basogintzako sektoreko langile guztiei zabaldu nahi diegu, baita garraioaren sektoreko langileei ere. Izan ere, azken asteotan bi garraiolari ere hil dira lanean, eta horrek agerian uzten du laneko heriotzek ez dutela etenik. Gure elkartasuna, halaber, Euskal Herriko langile klase osoari helarazi nahi diogu.

Duela egun gutxi bi garraiolari hil ziren lanean, bata Idiazabalen uztailaren 23an eta bestea Oiartzunen uztailaren 30ean. Horien heriotzekin, aurten gutxienez 6 garraiolari hil dira lanean Euskal Herrian. Sektore ezberdinak izan arren, errealitatea berdina da. Lan baldintza txarrek hil egiten dute.

Zoritxarrez, ez dira gertakari isolatuak. Urtez urte, basogintzan, garraioan eta arrisku handiko beste sektore batzuetan antzeko lan istripu hilgarriak errepikatzen dira. Lan baldintza gogorrak, ekoizpen-presioa, prebentzio-neurri eskasak eta administrazioen kontrol falta behin eta berriz agertzen dira laneko heriotzen atzean.

Bere egunean LABek agerraldia egin zuen Gipuzkoako Batzar Nagusietan basogintzan gertatzen den egoera hori salatzeko eta ustiaketan, prebentzioan, ikuskaritzan eta kontrol publikoan benetako aldaketak eskatzeko. Tamalez, gaur ezagutu dugun heriotzak berriro erakusten du salatutako arazoek bere horretan jarraitzen dutela eta urtez urte faktore berberak errepikatzen direla.

LABen ustez, Gipuzkoako Lan Ikuskaritzak ikuskari kopurua eta kontrolak areagotu behar ditu; Osalanek prebentzioaren arloko jarduera indartu behar du; eta Gipuzkoako Foru Aldundiak, bere eskumenen baitan, basogintza ustiaketa arloan, ezin du beste alde batera begiratzen jarraitu. Erakunde guztiek dute erantzukizuna lan baldintzak hobetzeko eta laneko heriotzak prebenitzeko.

LABek basogintzan, garraioan eta arrisku handiko gainerako sektoreetan prebentzioa, kontrol publikoa eta lan baldintzak benetan hobetzea eskatzen du. Ez dugu onartuko urtez urte arrazoi berdinengatik langileek hiltzen jarraitzea.

Langileen osasuna eta bizitza edozein interes ekonomikoren gainetik jarri behar dira beti.

AZKEN ALBISTEAK | ÚLTIMAS NOTICIAS

Ikuskizun eta ekitaldien sektoreak beste bi greba egun iragarri ditu Hego Euskal Herrian, azaroaren 26an eta 27an

LABek, ikuskizun eta ekitaldien sektorean Nafarroan ordezkaritzaren %100 duen sindikatuak, EAEko beste sindikatuekin batera (Teknikariok, ESK, ELA CCOO, UGT eta CNT) bi greba egun berri deitu ditu negoziazioak desblokeatzea eta sektoreko lehen hitzarmen kolektiboa sinatzea eskatzeko. Deialdi bateratuak bi lurraldeetan partekatzen den aldarrikapen bati erantzuten dio: prekarizatutako sektore baten erregulaziorantz aurrera egitea.

Mobilizaziorako deia egin dugu, Bizkaiko Esku-hartze Sozialeko hitzarmenaren negoziazioa blokeatuta dagoelako

Hamar hilabete baino gehiagoko negoziazioaren ostean, LAB, ELA eta ESK sindikatuok aurrerapausorik ez dagoela salatu dugu, eta abenduan bi elkarretaratze eta 2027an balizko grebak iragarri ditugu, Gizardatz patronalak aldarrikapenak aintzat hartzen ez baditu.

Arabako metala borrokan: negoziazioa orain!

LAB, ELA, CCOO, eta UGT sindikatuok, Arabako metalgintzako hitzarmenaren negoziazio batzordeko kideok, plataforma bateratu bat aurkeztu dugu SEAren aitzakia guztiak saihesteko eta, behingoz, sektoreko pertsonek behar duten eta merezi duten hitzarmena negoziatzera esertzeko. SEAk, ordea, entzungor egin die langileei eta ez du hartu nahi izan sindikatuek egindako plataforma bateratua