LABek, Sortuk eta Askapenak atxiloketaren atzean dagoen estrategia salatu dugu Bilbon, Brasilgo kontsulatuaren aurrean.
Gaur eguerdian LAB, Sortuko eta Askapenako ordezkaritza batek Lula da Silvaren aurkako jazarpena eta asteburu honetan eman den atxiloketa salatu dugu Brasilek Bilbon daukan kontsulatuan, idatzi bat erregistratuz.
Ekimen honek helburu bikoitza zuen. Alde batetik aipaturiko jazarpen mediatiko, politiko-poliziala salatzea, eta beste aldetik Lula da Silvari eta Brasilgo herriari momentu zail hauetan gure elkartasuna adieraztea.
Gure iritziz gertakari hauen atzean estrategia garbi dago. Datorren urrian Brasilen egingo diren hauteskundeei begira Lula da Silvak garaile ateratzeko aukera asko dituela, kosta ala kosta hauteskunde lehiatik kanpo nahi dute, Dilma Rousseff-en aurkako impeachment-arekin hasi zuten kontra-erreforma neo-liberalarekin jarraitu ahal izateko.
Estrategia hau demokraziaren kontrako eraso garbi bat da, azken finean faltsua den balizko ustelkeria delitu bat aurpegiratuta eta eskura dituzten komunikabideen boterea erabiliz urriko hauteskundeetarako hautagaitza bertan behera utzi nahi dutelako. Hau da, hauteskunde prozesua manipulatu egin nahi dute argi eta garbi.
Salaketa hau egiten dugunok demokrazia defendatzen dugu, eta beraz Lula da Silvak Urriko hauteskundeetan eskubide osoz bere burua aurkeztea defendatzen dugu. Brasilgo herriak izan behar du bere ordezkariak hautatu behar dituena, inolako injerentzia politikorik gabe.