2024-09-20
HomeEkintza PolitikoaJoseba Alvarez gure kideari eta Moussa kale saltzaileari babesa erakutsiko diegu asteazkenean,...

Joseba Alvarez gure kideari eta Moussa kale saltzaileari babesa erakutsiko diegu asteazkenean, Donostiako epaitegien aurrean

Donostiako Udalak eta Fiskaltzak urtebeteko kartzela zigorra eta inhabilitazioa eskatu dute bientzat, euren eskubide sozial, zibil eta politikoak bortxatu eta gero. Hala salatu dute Donostiako Udalaren aurrean egindako agerraldian. Asteazkenean, 10:30ean, epaiketa egunean, elkarretaratzea egingo da Egiako epaitegien aurrean, “Arrazakeriarik ez, epaiketarik ez” leloarekin.

“Udaltzainen jokabidea onartezina, arrazista eta biolentoa aztertu bejarrean, Eneko Goia alkateak Joseba Alvarez eta Moussaren aurka bi epaiketetan akusazio partikular gisa aritzea erabaki du. Hiru urteotan Udaltzaingoak ez du ikertu nahi izan gertatutakoa, eta autoritatearen aurkako eraso bat egon zen asmatu du Moussaren atxiloketa justifikatzeko eta Joseba Alvarez zigortzeko”, adierazi dute agerraldian.

2018ko ekainaren 24an izan zen gertakaria, Donostiako Parte Zaharrean, Abuztuaren 31ko kalean. Moussa kale saltzailea bertan zen lanean, eta bi udaltzainek oso modu bortitzean atxilotu zuten. Horren aurrean, Joseba Alvarezek erasotzaileei aurre egin zien modu ez biolentoan, nor ziren eta zertan ari ziren galdetuz. Udaltzaingoak LABeko kidea salatu zuen horregatik.

AZKEN ALBISTEAK | ÚLTIMAS NOTICIAS

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.