LAB sindikatuak PPk, pasa den abenduan nafar parlamentuak, oposizioko alderdi guztien bozekin, urtean ireki daitekeen jai egun kopurua 8tik 4era jaitsi eta asteko irekiera orduak 72tan mantentzen dituen lege proiektuaren onarpena errekurritzearen intentzioaren gaineko balorazio eskaini du gaur Iruñean.

LAB sindikatuak beti lan egin izan du, langileekin batera igande eta jai egunetan saltokiak ez irekitzeko aldarrikapena Nafarroan errealitatea izan dadin. Lan honek aurten garrantzia handiagoa hartu du oraindik, PPk ordutegien liberalizaziorako inposatu duen legea onartu ondoren; izan ere, lege honek urtean ireki daitekeen jai egun kopurua 16 arte handitu (orain arte Nafarroan legez 8 egun ireki zitezkeen baina akordio batek 4etara mugatzen zuen) eta astean ireki daitekeen ordu kopurua 90 ordutara (Nafarroan, orain arte, asteko maximoa 72 ordutan zegoen) igotzen du. Gainera lege honek autonomi erkidego guztiak 10 egunetako irekiera minimoa zehaztera behartzen ditu.

Pasa den abenduan nafar parlamentuak, oposizioko alderdi guztien bozekin, gai honetan legeak egiteko duen eskumena defendatuta, urtean ireki daitekeen jai egun kopurua 8tik 4era jaitsi eta asteko irekiera orduak 72tan mantentzen dituen lege proiektua onartu zuen.

Honen aurrean LAB-ek bere iritzia argiki adierazi du behin eta berriz: lege hau ez da nahikoa baina positiboa izan daiteke Nafarroako egoerara gehiago egokitzen delako eta 0 irekieraren bidean doalako. Eta arrazoi asko dugu hau esan eta gure 0aren aldeko jarrera mantentzeko:
− Sektoreko langileen lan-baldintzek txarrera egiten dutela eta prekarietatea merkataritzan igande eta jai egunetan lan egitea dela
− Honek lan postuak sortu ez, eta saltoki txikien biziraupena arriskuan jartzen duenez, enplegu suntsiketa ekarriko duela.
− Langileen lan eta familia bizitzak bateratzea ezinezkoa dela.
− Merkatalgune handiei mesede egiteko neurriak direla eta salmenta hauetara bideratzea bilatzen duela.
− Kontsumitzaileoi gastatzea gastatzeagatik helburu duen jendarte eredu kontsumista inposatu nahi digutela, harreman sozialak, kirola, kultura…bezalako ohituren gainetik.

Gure lana beti zintzoa izan da eta gure aldarrikapena argia: Nafarroan eta Euskal Herri osoan, irekiera 0! Eta gu, gure diskurtso eta planteamenduetan mantendu gara, beste batzuk ez bezala. Izan ere, PPk lege hau errekurrituko zuela iragarri zuen eta, lege hau ez betetzeak ekar zezakeen liberalizazioaren beldur direla argudiatuta, jakin izan dugu Izquierda-Ezkerra eta PSN, lege hau asimilatu eta hamar egun irekitzeko proposamena babestea erabakitzen ari direla.

Agerraldi honen bidez LAB sindikatua osatzen dugunok azken hauen jarrera lotsagarria salatu eta orain arte denok batuta egin dugun bidean jarraitzeko deia egiten diegu. Herri bezala erantzun behar diogu eraso berri honi! Madriletik datorren guztiari burumakur amen esateari uzteko garaia da! Ez dezatela hau gelditzea ezinezkoa dela esan. Posiblea da hau gelditzea baina kalean egitea da modu bakarra. Horretarako lanean tinko eta batuta mantentzea ezinbestekoa da. PP-UPN eta ANGED-ek entzun behar gaituzte! Nafarrok ez dugu jai egun eta igandeetan lan egin eta kontsumitu nahi!!! Merkatari txikien elkarteak, sindikatu guztiak eta oposizioko alderdi guztiak bat gatozela esan esan diegu. Ba orain, batuta, hau onartuko ez dugula erakutsi behar diegu!

Ez dezatela aitzakiarik jarri; Nafarroan 10 egun irekitzea baimentzen bada, beraiek izango dira errudun, hau baimendu dutelako, honen kontrako batere indarrik egin gabe. Beste aukerarik ez dagoela diote baina ez dute hortzak erakusteko inongo saiakerarik egin. Ez dezatela beste inor erruduntzat jarri: PP da hemen liberalizazioaren bidean pausuak ematearen errudun bakarra. Eta haiek kolaboratzaileak honen kontra ezer ez egiteagatik..

Hauek dira ere, beraz, Nafarroan honen ondorioz emango diren kaleratzeen errudun, langabetu tasa igotzearen errudun, langileen lan baldintzak prekarizatzearen errudun, denda txikiak ixtearen errudun… Beraiek dira. Herritarrek, dendari txikiek eta langileek eskatu ez dituzten eta nahi ez dituzten neurri hauek gelditzeko lan nahikoa ez egin eta inposaketa hauei bidea irekitzeagatik. Gehiengoaren kontra eta gehiengoaren kaltetarako hartuak direlako.

Ez dira Nafarron mesedetarako hartutako neurriak. Corte Inglés bezalako denda handiei eta merkatalguneei mesede egiteko besterik ez dira egin. Interes ekonomikoengatik eta haien presiopean.

PP-ri eta Madridi (eta haien kolaboratzaileei) esan nahi diegu errespeta dezatela nafar jendarteak, nafar langileek, Nafarroako sindikatuek eta nafar parlamentuko gehiengoak dioena. Ez dugulako inposaketa bat gehiago nahi eta onartuko!

Bertako alderdi politikoei inposaketa, injerentzia eta eraso berri hau onartu ez dezatela exijitzen diegu. Haien esku dagoelako Nafarroako konpetentziak defendatu eta hemengo gehiengoak dioena errespetu araztea.

Eta urtetan gai honetan bide lagun izan ditugun sindikatuei arduraz joka dezatela exijitzen diegu. Jarrera konformista eta eroso hori alde batera utzi eta gurekin lan egiteko planteamendu bat egitera eseri daitezela. Nafarron hitza ozen entzun arazteko eta irekierarik ez egoteko bidean pausu berriak emateko.

Azkenik nafar jendarteari helarazi nahi diogu hau gelditzeko modu bakarra mobilizazioa dela. Bertako erosle, sindikatu (langile) eta merkatari txikiak batu behar gara hau lotsagarria dela salatu eta kontra gaudela adierazteko. Eta alderdi, sindikatu eta enpresari txikien elkarteak ere uler dezatela: bulego eta toki erosoetatik atera eta nahikoa dela esateko mugitu eta mobilizatu daitezela.

Raxoiri eta Barcinari nahikoa dela ozen esateko garaia da.
Ez dugulako inposaketa gehiagorik onartuko!
Nafarroan Irekiera 0!
Jai egunak, bizi egunak! 

 

LAB SAREAN
{module[111]}