Iñaki Igerategi Lizarribar lankidea atxilotu dute bart Tolosako Suhiltzaile Etxean, bertan lanean ari zela. Polizia operazio berean atxilotu dute, baita ere, Juan Ignacio Otaño Ttinto.
Goizeko 02:00ak aldera azaldu dira guardia zibilak Oriako Suhiltzaile Etxean, eta esku burdinak jarrita eraman dute Iñaki, laneko arropekin.
Bien etxeak eta garaje bat miatu dituzte ondoren, eta 09:30ak aldera Madrilera eraman dituzte ibilgailu banatan guardia zibilek.
Atxilotuen eskubideak ez urratzea eskatzen dugu. Izan ere, oso kezkatuta gaude atxilotuei inkomunikazio garaian eman diezaieketen tratuaz, besteak beste. Gogora ekar ditzagun, esate baterako, Euskal Memoria fundazioaren datuak: azken 50 urteetan, 35.000 bat euskal herritar atxilotu dituzte eta horietatik 10.000 bat torturatu dituzte.
Atxilotzea, errugabetasunaren printzipioa ukatzea, inkomunikatzea eta torturatzea ez da, noski, gatazka konpontzeko metodorik aproposena. Metodo agortua da, atzera begirakoa, gatazka zalea. Euskal gizarteak beste bide-orri bat aukeratu du, aurrera begirakoa.
Gure elkartasuna adierazten diegu atxilotuei eta horien senideei, eta atxilotuen aldeko mobilizazioetan parte hartzeko deia egiten diegu Gipuzkoako Foru Aldundiko langileei. Hitzordua, gaur arratsaldeko 19:30ean, Andoaingo Zumea Plazan.
Donostian, 2012ko otsailaren 21ean