EAEko Hezkuntza Publikoko gainerako kolektiboetan lan hitzarmen berrien negoziazio-prozesuak zabalik dauden bitartean, ELA, CCOO eta UGT sindikatuen oposizioak oztopatu du garbiketa eta sukaldeetako lan-hitzarmenaren negoziazio-mahaiaren osaera eta egutegia ezartzea. Bigarren aldiz, aipaturiko sindikatuek indarrak batu dituzte langile kolektibo feminizatu, prekarizatu eta adindu honen lan-baldintzak hobetu ahalko lituzkeen prozesua blokeatzeko.
Atzo, EAEko Hezkuntza Sailak deituriko sukaldari eta garbitzaileen mahaian, lehenengo puntuan, lan hitzarmen berriaren negoziazio-mahaia osatzeko proposamena bazegoen ere, gure harridurarako gainerako sindikatuek berriz ere geldiarazi zuten prozesu negoziatzailea abiatzeko aukera.
LAB sindikatuak, mobilizazio dinamika luze eta arrakastatsuen ondorioz, 2018an hezkuntza publikoko kolektibo guztietako akordioak sinatu zituen. Harrezkero lan hitzarmenen negoziazioa irekitzea eskatu zuen, eta orduko akordioak prozesu negoziatzaileen oinarrian daude gaur EAEko Hezkuntzarekin irekitako negoziazio-prozesuetan. Gainerako sektoretan negoziazio-bilerek aurrera darraiten arren, kolektibo feminizatu, adindu eta prekariezatuenak diren sukaldari eta garbitzaileen lan hitzarmenaren negoziazioa abiatzea blokeatzen jarraitzen dute ELA, UGT eta CCOO sindikatuen ordezkariek.
Hezkuntza Sailak bi aldiz jarri ditu mahai gainean lan hitzarmen berriaren negoziazioarekin hasteko proposamena – bat aurreko ikasturtean, eta bestea, atzo-, baina ELA, UGT eta CCOOk eskaintzari uko egin diote berriz ere. Beraien aitzakia da kolektibo honen EPEa negoziatu nahi dutela lan hitzarmena berritu baino lehen.
EAEko hezkuntza publikoko langile-kolektibo guztietan —irakasleak, heziketa berezia eta Haurreskolak Partzuergoan— egoera berdina ematen bada ere, hau da behin behinekotasunarekin aldatzeko EPEak behar badira ere, mahaiak eratu dira eta gai biak mahai gainean daude, negoziazioak motel edo bizkorrago badoaz ere. Beraz, LABetik ezin dugu ulertu besteetan posiblea dena kolektibo hauetan ukatzearen atzean dauden interesak, are gehiago, langileen eskubideak defendatu behar dutenen partetik.
Sukalde eta garbiketan, beste aldarrikapenen artean, ratioak eta lan-zamak arintzea, gazte-berritze planak, lan osasuna zaintzea eta arrisku psikosozialen prebentzioa, funtzioak zehaztea, formakuntza hobetzea, euskalduntzea eta langileen lan-baldintzak hobetuko lituzkeen beste neurrien negoziazioari mugak jartzen dizkiote aipatutako sindikatuek, langileak 2009tik berritu gabe dagoen hitzarmenarekin jarraitzera kondenatuz.
Langileen ekubideen defentsan, behin-behinekotasun tasa jaistea, pribatizazioa geldiaraztea, lanpostuak sortzea, edo kontratazioan egon daitekeen iruzurrarekin amaitzea ahalbideratuko lukeen kontsolidazio prozesua exijitzea eta lan hitzarmen berria negoziatzea prozesu uztargarriak direla argi dugu LABetik. Hori dela eta, biak lortu arte burrukatzen jarraituko dugu, ematen zaizkigun aukerei uko egin gabe.