LAB sindikatuak, Hezkuntza Departamenduak egindako dokumentu baten berri izan du. Herrialdetako hezkuntza delegazioetan dagoen dokumentu honen bitartez, ikastetxetako zuzendaritzei jarraibide batzuk ematen zaizkie, gastu publikoa berriro ere murrizteko helburuarekin.

Zuzendaritzei, irakasleen gaixotasun bajak kontrolatzeko eman behar diren urratsen inguruko informazioa ematen diete.

Jarraibide hauen arabera Ikastetxe batean sortzen diren ordezkapenak eskatu baino lehenago, Zuzendariak ordezkapen hau beharrezkoa den ala ez baloratu beharko du, halaber, bajan dagoen irakaslearen egoeraren jarraipena egin dezala eskatzen diote zuzendariari.

Dokumentuak horrela dio:”… bereziki, lanera joan ez den irakasleak medikuarekin izango duen hurrengo hitzordua eta alta jasotzeko balizko aukera.” Horrelako agindua 5 eguneko baino gutxiagoko bajekin gomendatzen da.

Gaixotasun bajak kontrolatzeko emango diren aldaketen inguruan publikatu den azkeneko dekretuak, 624/2014, gaixotasun bakoitzak izan behar duen iraupena baloratzeko taula jasotzen du, kasualitatez, 5 egun baino gutxiagoko bajen inguruko informazioa eskaintzen da. Honen aurrean LAB sindikatuak zera salatu nahi du:

– Irakasleen bajak lehenengo egunetik ordezkatu behar dira. Ikasleei eskaini behar zaien arreta premiazkotzat jotzen du LABek.
– Gaixotasun baja baten jarraipena egiteko ahalmena, soilik, zerbitzu publiko edo mutuaren esku dago.
– Hezkuntza Departamenduak proposatzen dituen jarraibideak guztiz ilegalak dira, lankide batek horrelako jarraipenik egiteko ahalmenik ez baitu.
– Praktika honen ondorioz, gaixorik dagoen irakasleak bere egoeraz informazioa ematera baldintzatu edo behartuta senti daiteke.
– Horrelako praktikak aurrera eramateko Ikastetxetako zuzendaritzetan osasungintzako profesionalak kontratatuko dira?

Hezkuntza Departamentua eta bere bazkidea den Mutualia, langileon osasunarekin zerikusirik dauzkan hainbat egoeratan murrizketak aplikatzen ari direla gogoratu behar dugu, besteak beste, aldi baterako ezgaitasunetarako osagarrietan eta haurdunaldi arrisku egoeretan. Murrizketen politika honekin lotzen dugu orain aplikatu nahi dituzten neurri berri hauek. Beraz, LAB sindikatuak Hezkuntza Departamentuari dokumentu hau bertan behera uzteko eskatzen dio.