Agoizko Lehen Auzialdiko eta Instrukzioko 1 zenbakiko Epaitegiak, 2022ko abuztuaren 5eko auto baten bidez, 2021ean atxilotu zituzten LABeko sei sindikalistaren kontrako jarduerak artxibatzea agindu du. Hala, instrukzio-epaileak ez du delitu zantzurik ikusten emakume langileentzako lan-baldintza duinak eskatzen zituen eta patronalak Nafarroako garbiketa-hitzarmenaren negoziazioan ezarritako blokeoa salatzen zuen ekintza sindikaletan.
LABek ordezkatzen duen sindikalismo borrokalari, eraginkor, feminista eta ezberdinaren aurkako polizia-operazioa
Duela urtebete baino gehiago, 2021eko apirilaren 20an, Espainiako Polizia Nazionala Nafarroako jarduera sindikalaren egunerokotasunean sartu zen, garbiketako langileak eta LABeko sindikalistak atxilotuta. Gaur, emaitza ikusita, ikuskizun polizial hura eta bere dimentsioa ez zen kasualitatea izan. Espainiar poliziak CEN Nafarroako Enpresaburuen Elkarteko eta ISN enpresako salaketak koordinatu zituen. Ondoren, lankidetza eta aliantza ariketa argi batean, bi ekintza independenteren salaketak batu zituen, iritzi publikoaren aurrean LAB sindikatuaren eredu sindikal borrokalaria, eraginkorra, feminista eta ezberdina zalantzan jarriko zuen polizia-operazioa ahalbidetzeko. Izan ere, eredu aktibo horrek gero eta babes handiagoa du Nafarroan, batez ere sektore feminizatuetan.
Kolpe judiziala: ez da behar bezala justifikatu kausa eratzea, polizia-operazioa eta atxiloketak eragin zituzten ustezko delituak egon izana
Agoizko Lehen Auzialdiko eta Instrukzioko 1. Epaitegiaren artxibatze-autoak agerian uzten du ez dagoela deliturik ekintza sindikaletan, horrekin batera enpresaburuen salaketen eta poliziaren jardunaren asmo txarra. Izan ere, instruktoreak uste du Espainiako Polizia Nazionalaren zabaltze-eginbideek ez dutela ezer berririk gehitzen, eta balorazio berak egiten jarraitzen du bide-segurtasunaren aurkako ustezko deliturik ezari dagokionez. Derrigortze- eta mehatxu-delituei dagokienez, nabarmentzen da ez dagoela kaltetuaren salaketarik. Hala, gogorarazten du kamioiaren gidariak, lekukoen deklarazioan, ukatu egin zuela halako gertakaririk izan zenik. Ondorioz, ezin da delitu-zantzurik hauteman, eta ezin da ulertu lan-aldarrikapenaren iragarkia halako derrigortzetzat har daitekeenik. Azkenik, kalte-delituari dagokionez, instruktoreak berriro azpimarratzen du kamioiaren gidariak adierazi zuela ibilgailuari ez zitzaiola kalterik eragin, eta enpresak alegatutako kalteak amaitu gabeak eta mugagabeak direla. Ikertuak kamioi gainera igo ziren, kaltetzeko batere asmorik gabe.
Aurrera egin eta borroka-ziklo berrian protagonista izan.
Borroka ez da bide erraza, baina bide bakarra da. Ekintza sindikal feministaren bidez, langileok historiako protagonista bihurtu gara, eskubideak eskuratu ditugu, aldaketak eragin ditugu eta garaipenak lortu ditugu. Une egokia da aurrerapauso bat emateko eta sindikalismo ezberdin eta berrian parte hartzeko Nafarroan.