Pentsioen kutxari eginiko lapurreta salatzen du LABek eta horrekin batera, 1.080 euroko gutxieneko pentsioa ezartzeari uko egiten jarraitzen dutela ere bai. Rajoiren Gobernuak Pentsio Publikoen “kutxa” gisa ezagutzen dugunari astinaldia eman dio berriro. Azken urteetan Funtsak 42.608 milioiko lapurreta jasan du, eta hala, 2011tik 2016ª bitarte, 66.815 milioi izatetik 24.207 milioi izatera pasatu da. 

Urteetan langileek lortutako aurrezkiak xahutzen dituzten bitartean, Gizarte Segurantzako kontuetan diru-sarrera berririk ez dute egiten, besteak beste, prekarietatearen erruz, soldata baxuak direla medio edota soldatarik handienak dituztenek osotasunean kotizatzen ez dituztelako, diru-kutxa publikora bideratu beharko litzatekeen zati garrantzitsu bat euren poltsikuetan gorde eta pentsio-funts pribatuetara bideratuz. Halaber, enpresariek ere, jasotzen dituzten “diru-laguntzak” tarteko, ez dute diru-kutxa publikora bideratu beharko luketen kopurua guztia bideratzen.

Horri guztiari gehitu behar diogu EAEn, PNV-PP-PSOE alderdien jarrera, 1.080 euroko gutxieneko Pentsio Duina ezartzearen kontrako jarrera adierazi dutelako Legebiltzarrean, Pentsiodunen Plataformek egindako eskariari muzin eginez. Gauzak horrela, pentsionista askok bazterketa eta pobrezia egoeran jarraitzea sustatzen ari dira, kasurik gehienetan kopuru horren azpitik kobratzen ari baitira. Gogoratu, gainera, Europako Gutun Sozialaren arabera, ezarritako kopuruak balio izan behar duela pertsona guztientzat etorkizun duina bermatzeko.

Bada garaia Euskal Herrian Babes eta Gizarte Segurantza Sistema Propio bat erdiesteko, pertsona guztientzat pentsio publiko duinak bermatuko dituena. Bada ordua herri-sektore honi, pentsiodunei alegia, ezarri izan zaizkien murrizketa-politikekin amaitzeko. Pentsiodunek urteetan lan egin eta kotizatu dute, baina orain, zigorrak, murrizketak eta osasun sisteman berrordainketa inposatzen ari zaizkie, zer eta euren gaixotasunak behar bezala artatzeko.

Gure pentsioak lapurtzen ari zaizkigun horiek seinalatu eta salatu behar ditugu, PNVk egiten duen moduan, egungo egoeraren alternatiba gisa pentsioen pribatizazioa sustatzen ari diren horiek guztiak. Euskal Herrian pertsona guztiek Gutxieneko Pentsioa izateko eskubidea aldarrikatzen dugu, beren azken urteak baldintza duinetan emateko aukera izan dezaten. Horregatik, berriro diogu, sisteman propioa aldarrikatzen dugu, Madrilekiko eta handik datozen murrizketekiko menpekotasunik gabea. 1.080 euroko gutxieneko pentsioa bermatzea eskatzen dugu.