LABeko Helduak eta Pentsiodunen arloko ordezkaritza batek Nazioarteko Sindikatuen Batasunak Danimarkako Copenhaguen hirian antolatu duen Europar Konferentzian parte hartu du. LABen ordezkaritza Joseba Gonzalez eta Fernando Iriartek osatu dute. 

Nazioarteko konferentzia honen xedea tokian tokiko esperientzien elkartrukatzeaz gain, Europar kontinentean duintasunez bizi irauteko pentsio publikoa kontinenteko bazter guztietan errealitatea izan dadila aldarrikatzea da, non osasun sistema eta sendagaiak doakoak izango diren eta gizarte segurantza publikoa izango den.

LABeko ordezkaritzak EHan Heldu eta Pentsionistek bizi duten egoera azaldu du. EHko populazioaren %25 a heldua eta pentsioduna da dagoeneko. Hala ere, sektore ezegonkorra da, Heldu eta pentsionisten %54 (emakumezkoak gehienak) Europako karta sozialak gomendatutako gutxieneko pentsioak baino baxuagoak jasotzen ditu, hutsalak.

Premiazko egoera honetan, Europak zehaztutako pentsio minimo erreferenteak aintzat hartuta (herri bakoitzeko batezbesteko soldataren %60a), pentsio baxuenen osagarritasunaren alde borrokan ari gara. Gurean, gutxieneko pentsio hori, 1080 €-koa beharko luke.

LABen borrokak badu helburu ere, Euskal Herrian Gizarte Segurantza eta Babes Sistema propioa izatea, euskal erakundeen eskumen guztiekin: pentsioak, mendekotasunari arreta, osasungintza… Ardatz ditugu baita ere: gizon eta emakumeen arteko berdintasun eskubideen aldarrikapena; erabilerraztasuna; osasun-arreta osoa, publikoa eta doakoa…

Ez dira faltatu LABeko Idazkari nagusi izandako Rafa Diez Usabiagaren askatasuna aldarria eta Pentsiodun eta Erretirodunen Nazioarteko Sindikatuen Batasuna antolaketa lanetan ibili zen Igor Urrutikoetxea omeneko hitzak.

 

 LABeko Helduen eta Pentsiodunen arloko delegaritzaren agurra
[EUS] [ES] [FR] [EN] [DE]