Patronalaren blokeoa eta Gipuzkoako Foru Aldundiaren erantzukizun falta salatu dituzte, eta langile publikoekiko ekiparazioa, partzialtasuna amaitzea eta ratioak hobetzea aldarrikatu dute.
Beste behin ere, Gipuzkoako helduen egoitzetako langileak kalera atera dira, lan hitzarmenari dagokion negozazio mahaia blokeaturik dagoelako. Asteazkenetik gaur arte, lanuzteak egin dituzte langileek, ekainean egin bezala, eta gaur elkarretaratzea egin dute Adegiren eta Matiaren aurrean.
Patronalak mahai negoziatzailean duen ezaxolazko jarrera ikusita, langileek mobilizazioaren eta borrokaren alde egin dute. Hainbat bileren ondoren, patronala osatzen duten enpresek (Matia, Adegi eta Lares), entzungor egin diete langileen eskakizunei eta sektoreko langileen lan baldintzak duintzeko egindako proposamen oro baztertu dute, langileen artean ezinegona eta haserrea areagotuz.
Gipuzkoako Foru Aldundiaren kudeatzen du helduen egoitzen finantzazioa, eta, beraz patronalaren adinako erantzunkizuna dute instituzio hori kudeatzen dutenek ere. Horregatik, arduraz joka
dezatela exijitzen die LABek batzuei zein besteei. Orain arteko eredu pribatizatzaileak prekaritatera kondenatzen ditu langileak, eta egoera hori betikotzea dute helburu patronalek zein instituzioek. Hitz politen eta egunkarietako titularren gainetik, konpromisoak eta ekintzak behar dira, eta orain ez da halakorik izan.
Bada garaia bestelako zaintza eredu baten alde pausuak egiteko, eta, bide horretan, lehen urratsa litzateke soldatak langile publikoenekin ekiparatzea, partzialtasuna amaitzea eta ratioak hobetzea. Borondatea behar da horretarako.
Lan zentroetan, kalean eta behar den tokian, aldarrikapenak haizatzen jarraituko du LABek, lan hitzarmen duin bat erdiestetik hasi eta zaintza sistema publiko komunitarioranzko ibilbidea egiten jarraituz.
