Gasteizko hustubideak garbitzeaz arduratzen den SACYR AGUAS enpresako langileek mobilizazio bat burutu zuten atzo AMVISAren aurrean. Ia plantila osoa greban dago hitzarmen duin bat lortzeko, duela hiru aste hasi zen greba honen ondorioz, eta ordutik, Gasteizen 5.000 hustubide baino gehiago garbitu gabe daude.
Azpikontrata honetan, Estatuko hitzarmen bat (Uraren Ziklo Integralekoa) aplikatzen diete, eta horren ondorioz, soldata eta lan-baldintzak eskasak dira, Euskal Herrian dugun bizi-mailari aurre egiteko. Hori dela eta, langileek borrokan jarraitzen dute, hitzarmen propio bat lortzeko, aldarrikapen nagusiekin:
- Soldata duinak izatea
- Langileek jasaten dituzten toxikotasuna eta penagarritasuna behar bezala aitortzea
- Lanaren eskatutako prestutasuna (astelehenetik larunbatera bitarteko lanaldiekin eta urte osoan erreten-taldea ezartzea) behar bezala saritzea
- Estaldura sozialak eta aldi baterako ezintasunaren osagarriak hobetzea
SACYRrek ez dio balioa ematen langileen lanari, eta bere interes ekonomikoak baino ez ditu zaintzen. Horrekin batera, AMVISAren konplizitatea eta udalaren pasibotasuna ere agerian geratu dira, nahiz eta zerbitzu honek jendartearentzako oinarrizko garrantzia izan.
Hori dela eta, langileek AMVISAri eskatzen diote bere esku-hartzea, zerbitzuaren erakunde esleitzaile den aldetik, gatazka bideratze aldera. Lan-baldintzak duintzea, langileen aldarrikapenei erantzutea eta zerbitzu honek indartzea eskatzen diote bai AMVISAri baita Udalari ere.
LABek berriro ere deia egiten die bai SACYR eta bai AMVISAri negoziazioak hasteko, gatazka konpontzeko eta langileon eskubideak bermatzeko.