2024-03-05
HomeZerbitzu PublikoakEnplegu PublikoaEnplegu publikoa egonkortzea ezinbesteko helburu bezala hartzea eskatu diogu Eusko Jaurlaritzari

Enplegu publikoa egonkortzea ezinbesteko helburu bezala hartzea eskatu diogu Eusko Jaurlaritzari

LAB sindikatuko ordezkaritza batek berriki izendatuak izan diren EAEko Funtzio Publikoko arduradunekin bilera egin du gaur goizean. Olatz Garamendi sailburua, José Maria Armentia sailburuordea eta Jon Agirre Lan Harremanen Zuzendaria hurrenez hurren Funtzio Publikoko arduradunak dira eta Mahai Orokorrean langile publikoentzat oinarrizkoak diren gaiak negoziazioa zuzenduko dute. Legegintzaldi honetan kargu berria hartzen duten pertsonak izanda, LABek azken urteetako balantze bat egitea beharrezkoa ikusi du, baita funtsezkoak ikusten ditugun aldarrikapenak planteatu ere.

Azken urteetako balantzeari helduta, inposizioa eta aldebakartasuna izan dira azken urteetan Gobernuak erakutsi dituen jarrerak. Madrilen ezartzen ziren neurri zentralizatzaileak txintik esan gabe onartu eta bertako negoziazio esparruen alde ezer gutxi egin du Eusko Jaurlaritzak. Aurreko urteetan egindako murrizketak leheneratzeko inolako proposamenik ez du egin, Madrilen horretarako baimena eman ezean. Hala nola, erosahalmena berreskuratzea ez ahalbidetzea (%14ko galera zenbatu daiteke) edo erretiro sarien debekua mantentzea besteak beste langileen lan baldintzak okertu egin ditu.

Zalantzarik gabe enpleguaren gaian legegintzaldi galdua izan dela esan dezakegu. Behin-behinekotasun tasa ikaragarria daukagu euskal administrazioetan eta gobernua ez da gai izan sindikatuoi enplegu plan bat proposatzeko ere. Deialdi publikoen iragarpenak propagandarako erabili ditu, milaka langileren egoera ezegonkorra kontuan hartu gabe. Guk oso garbi izan dugu, urteetan zerbitzu publikoetan lanean egon diren bitarteko langile guzti horien egoerari konponbidea emateko lege propio bat onartu behar dela. Euskal administrazioetan daukagun egoerari irtenbidea emateko estatuan onartzen diren legeak ez dira nahikoak. Estatuko gobernuak aurkeztu duen aurrekontu lege proposamena horren adibide argia da, birjartze tasa mantentzeak enplegu deialdi publikoetan beharrezkoak diren lanpostu kopurua murriztu egingo baitu.

Enplegu egonkortasunaren eremuan pausoak ematea ezinbestekoa dela uste dugu. Administrazioen utzikeriak sortutako salbuespen egoera batean gaude, non bitarteko langileak diren milaka pertsonek urteak daramatzaten beraien lanpostuan finkatzeko zain. Horregatik, uste dugu kasu horietan kontsolidazio deialdi bereziak egin behar direla eta deialdi horiek bizi dugun salbuespen egoera hori kontuan hartu behar dutela. Hori dela eta, administrazio bakoitzak daukan egoerara moldatu daitezkeen tresnak ahalbidetzea eskatu ditugu; lanpostuan lan egindako denbora balioestea, oposizio fasea baztertzailea ez izatea edo meritu lehiaketa bidezko deialdiak dira, beste batzuen artean, onargarriak iruditzen zaizkigun tresnak.

LABk bertako negoziazio eremuak defendatzen jarraituko du. Oso argi utzi dugu ez ditugula Madriletik datozen erabakiak onartuko, hala nola, soldata igoera eta enplegu beharrak zein egonkortasunerako neurriak hemen negoziatu eta adostu behar direla. Sailburuordeari jarrera hori dagoeneko aurreratu diogu; Madrildik proposatzen dena zuzenean hemen aplikatu nahi badu ez duela LAB bidelagun izango. Hori horrela bada, dagoeneko hainbat sektoreetan aurrera eramaten ari garen mobilizazioak gogortzea besterik ez zaigu geldituko.

AZKEN ALBISTEAK | ĂšLTIMAS NOTICIAS

LABek Munduko Federazio Sindikalak Sao Paulon egindako Kontseilu Presidentzialean parte hartu du

Pasa den asteburuan Munduko Federazio Sindikalaren Kontseilu Presidentziala egin zen San Paolon, Brasilen. Munduko Federazio Sindikala 1945 urtean sortutako elkartea da. 133 herrialdetako 105 milioi langile inguru ordezkatzen ditu. Kontseilu Presidentziala bere zuzendaritza gune nagusia da, kontinente desberdinetako 50 kidek osatutakoa.

Lan eta bizi baldintzak ez dira hobetzen eta prekaritateak egiturazkoa izaten jarraitzen du

Araba, Nafarroa, Gipuzkoa eta Bizkaian 141.582 langabe daude; beraz, pasa den urtetik %2,13a jaitsi da langabezia Hego Euskal Herrian. Enplegua, ordea, sektore prekarioetan sortzen ari da, lan baldintza prekarioekin eta egoera zaurgarrian dauden herritarren bizitzetan inpaktu zuzenagoa eraginez. Hego Euskal Herrian, 25 eta 64 urte arteko bi herritarretik bat prekaritate egoeran bizi da, enplegua izan arren, bizitza duina bermatzeko diru-sarrera nahikorik gabe.

San Juan de Dios ospitaleko langileek elkarretaratzea egin dute Iruñean, hitzarmenaren negoziazioa blokeatuta dagoela salatzeko

San Juan De Dios Ospitaleko enpresa batzordeak elkarretaratzea egin du Iruñean, Osasunbidearen egoitzaren parean, Oliveto kondearen kalean. 2023-2024 hitzarmen kolektiboaren negoziazioaren egoeraren berri eman dute. 2023ko abenduan, Grupo Independiente eta LABek osatutako enpresa-batzordeak, negoziazio-plataforma aurkeztu zuen, eta abenduaren 15ean mahaia eratu zen, urtarriletik aurrera negoziazioari ekiteko.