Hamarnaka lagun elkartu dira gaur goizean LABek antolatutako jardunaldietan. Iñigo Bilbaok aurkezpenean adierazi bezala, bikoitza zen helburua. Batetik, osasungintza publikoaren defentsan sakontzea, eta bigarrenik, erronka honi begira, sektore desberdinetatik sor daitezkeen ekimenen indarrak batzea, hala nola, sektoreko langileak eta erabiltzaileak.
Edurne Agirre LABeko Osakidetzako arduradunarena izan da lehen hitzartzea, eta EAEko osasungintza publikoan ematen ari den eraso pribatizatzailearen berri eman du. Txomin Gonzalezetk, bere aldetik, Nafarroako Osasunbidea izan du hizpide, Marta Vera kontseilariaren agintepean egindako politikak eta hauek sortutako erantzun herritarretan sakonduz.
Hego Euskal Herriko ikuspegiaz gain, Catalunya eta Madrilgo ahotsak ere entzun ahal izan dira gaur goizean. IAC-Intersindical Catalanako Edu Lucasek Catalunyako esperientziaren berri eman du. Toño Gómezek, CASekoak, Madrilgo kasua konpartitu du bertaratutakoekin, PPren agintepean egindako pribatizazio saio bortitzak eta sektore ezberdinetatik emandako erantzunak, “marea” deitutakoetan amaitu direnak.
Entzuleek jarraian egin dituzten galdera interesgarri eta zorrotzetan ikusi da hitzartzeek bertaratutakoengan sortutako interesa.
Atsedenaldiaren ondoren abiatu da bigarren blokea. Ikuspegi sektorialak azaldu zaizkigu oraingoan. Karlos Ibarguren Osasungintza Euskalduntzeko Erakundeko presidenteak euskalgintzaren ikuspegia eman du. Luis Galdos SAREko kideak gaixorik dauden presoen eskubideez hitz egin du. Begoña Zabalak, Emakume Internazionalistak eta Nafarroako Abortoaren aldeko Batzordeko kideak ikuspegi feminista eskaini digu eta Carlos Ruizek, pentsionistena.
Amaieran, Mati Iturraldek jardunaldietako ondorio nagusiak laburtu ditu.