Gaur, uztailaren 9an, Arabako metalgintzako mahai negoziatzailea bildu da eta bertan, SEAk bere jarrerari eutsi dio: aurrerapenik ez du egin eta eragin mugatuko hitzarmena sinatzea ez du baztertzen. Horren aurrean, LABek metalgintzako hitzarmen duin bat exijitzen du, eta berau, bai ala bai, gehiengoak sinatuta egon behar dela planteatzen du.

Gaurko bileran, SEAk aurreko bileretan izandako jarrera eutsi dio: sailkapen profesionala estatuko metalgintzako hitzarmenean jasotakoa izatea, 2018an soldata igoerarik ez egotea, azpikontratetako langileen subrogazioa baztertzea,…

Horretaz gain, argi utzi du eragin mugatuko hitzarmen berri bat – hau da, ordezkaritza sindikalaren gutxiengoak sinatuta – ez duela baztertzen, eta irizpide bera defendatu du UGT sindikatuak. Posizio hori defendatzeko 2 balizko aukera aurreikusi ditu patronalak: eragin mugatuko hitzarmen bat egotea ala ez egotea hitzarmenik.

LABen ustez, planteamendu hori erabat faltsua da, SEAk beti edukirik gabeko hitzarmena bilatzen duelako eta horretarako errazenera jo izan du: sindikatuen gutxiengoarekin sinatzea.

Horregatik, LABek hitzarmena duina izatea eta gehiengoan sinatuta egotea exijitzen du, sektoreko arazoei erantzuteko: soldata baxuak, lanaldi altua, azpikontratazioa, prekarietatea, kontratazioan dagoen iruzurra, emakumeen diskriminazioa, lan osasunaren falta,… Beraz, soilik arazo horiei konponbidea bilatuta lortu daiteke LABen sinadura.