Tristea da epaile batek argitu behar izatea EAJk bere garaian argi eta garbi izan zezakeena, baina LABen pozez hartu dugu berria. Epaia argia da eta helegite batek ez zuen irabazteko aukerarik izanen. Hortaz, Aldundiari eskatzen diogu epaitegien bideari amaiera ematea, bere jarrera politikoa aldatzea eta Igerategi bere lanpostuan jartzea ahalik eta azkarren.
2018.eko otsailean, espetxe zigorra beteta eta kalean, Iñaki Igerategik bere suhiltzaile lanpostura bueltatzea eskatu zuen. Aldundia gobernatzen duen EAJk, ukatu egin zion eskubide hori eta kalera bidali zuen.
Denbora guzti honetan behin eta berriz esan dugu aurrekari juridiko guztiek Igerategiri arrazoia ematen ziotela eta lanean egon behar zuela, EAJren erabakia politikoa zela, ez juridikoa.
Maiatzaren 15ean, Administrazio Auzitegian izan zen epaiketa eta argi gelditu zen Aldundiak ez zuela argudio juridikorik. Urte luze honetako susmoak egiaztatu genituen epaiketan eta, aurrekariak Igerategiren alde, espero genuen epaileak itzultzea langileari bere eskubidea dena, Aldundiak ukatu diona.
Pasa den ostiralean epaileak eman zuen bere ebazpena: Igerategiri bere suhiltzaile lanpostura itzuli behar du. Epaileak kontuan hartzen ditu Langile Publikoaren Oinarrizko Estatutua, Funtzio Publikoaren Euskal Legea, Kode Penala eta Auzitegi Nazionalak eman zuen epaia, eta argi ondorioztatzen du inhabilitazio hori ez dela aplikagarria eta ez dagokiola Aldundiari hura zehaztea, hortaz Igerategi bere lanpostura itzuli behar dela.