LAB sindikatuaren ordezkariek agerraldia egin dute gaur Eusko Legebiltzarreko Osasun Batzordearen aurrean, Osakidetzako pertsonal-politikaren eredua eta hautaketa-prozedurak aztertzeko egin duen bilkuran.
Gure iritziz, Osakidetzako pertsonal-politikaren hobekuntza hiru osagai nagusitan oinarritu behar da:
1-EPE eredu gardena
LABen iritzian, Osakidetzako Zuzendari Nagusiak aurkeztu dituen neurrietako batzuk EPE prozesuetan gardentasuna hobetzeko balio dezakete, baina eurak bakarrik ez dira nahikoak izango kategori batzuetan errotuta dauden praktika ustelak desagerrarazteko, ezta EPE prozesua garbia %100ean bermatzeko ere. Izan ere, edozein neurri soilik izango da eraginkorra Osakidetzaren zuzendaritzaren aldetik jarrera irmo eta konbentzituarekin batera badoa, orain arte gertatu ez dena, alegia. Bestaldetik, proposatutako beste neurri batzuekin ez gatoz bat. Adibidez:
• Epaimahaien osaketan kide gehiegi proposatzen dira, filtrazioak kontrolatzea zailtzen duena.
• EAEtik kanpoko adituen beharra aldarrikatzea suposatzen du, praktikan, EAEn ez garela EPE gardena egiteko gai, eta ez du ezer bermatzen.
• Edozein eredu berri gertatu denaren onarpenetik abiatu behar da, filtrazioen sistema ustela argituz eta erantzukizun guztiak asumituz.
2-Kontratazio politika
Mahai gainean jarri dugu LABek publiko egin duen Osakidetzako ESIetako kontratazioari buruzko ikerketa, eta bertan agertzen diren zifretatik sortzen diren ondorio kezkagarriez ohartarazi dugu. Izan ere, argi gelditu da Osakidetzako langileen estruktura azpi dimentsionatuta dagoela, hau da, ez dagoela jende nahikorik lanean. Joera hau urtez urte handituz doa, modu kezkagarrian, erretiroa hartzen duen langile kopuru handiarekin. Honako pertsonal finkorik eza eskandalagarria den behin- behinekotasun tasak (plantilaren %40 ingurukoa) estaltzen du, estrukturakoak diren lanpostuak “zerbitzuko beharrak” kontratuen iruzurrezko erabilerarekin mozorrotuz. Zifretan azalduta, esan dezakegu gaur egun beharrezko diren 3.000 plazak kontratu mota hauekin kubritzen ari direla; urteko 1.000 langile erretiratuko direla, eta, momentu honetan, gutxienez, 7.000 plazatako EPEa beharko genukeela Osakidetzaren estrukturak eman beharreko arretari eutsi ahal izateko, kontuan hartuta urte bakoitzean 1.000 plaza gehiago izango direla erretiroen ondorioz.
Osakidetzak kontratazio prekario hau gelditu behar du, eta urgentziaz moldatu behar du bere langile kopurua. Gaur pairatzen dugun egoerak ahultzen du sistema publikoa, prekarietatea bultzatzen du eta filtrazioak bezalako praktika ustelak elikatzen ditu.
3- Asistentzia-Taldeen Ratioen antolamendurako Legea
Aurreko puntuei lotuta, LOREA (Asistentzia-taldeen Ratioen Antolamendurako Legea) egitasmoari buruzko eztabaida bat irekitzeko beharra azpimarratu dugu, kalitate eta lan baldintzen kaltetan politikariek Osakidetzan murrizketak ezartzeko aukerak ekiditeko eta kalitatezko zerbitzua bermatzeko bete beharrezkoa izango den LABek egindako lege proposamena.
Ratioen Lege hau Osakidetzako langileen kontratazio, antolakuntza eta lana antolatzeko eredu berria eraikitzeko oinarri egokia izango litzateke.