Negoziazio orok prozesu garden eta kontrolatua jarraitu behar du, eta Administrazio Publikoan Mahai Sektoriala da hori bermatzen duena. Gai ekonomikoak, gainera, Mahai Orokorrean eztabaidatu behar dira.
Osasunbideko langileen lan baldintzak hobetzeko asmoz Departamentuak hasi duen hausnarketaren berri entzun ondoren, LABek honakoa exijitu nahi du: dei dezala legeak aurreikusten duen negoziazio foroa; hau da, Osasun arloko Mahai Sektoriala.
Negoziazioa modu garden eta legezko batean garatu behar dela ulertzen dugu LABen, Osasunbideko langileen ordezkaritza guztia kontuan hartuz. Eta negoziazio orok, horretarako, dagokion arloko indar sindikal guztiak biltzen dituen organotik pasa behar du, Mahai Sektorialetik alegia. Are gehiago, diru kontuekin loturiko gaiak Mahai Orokorrera eraman behar dira.
Aparteko orduak ordaintzeko produktibitate kontzeptuaren berrikuspena planteatzen baldin bada, prozedura horretan ordainketaren gardentasuna eta kontrola bermatzeko neurriak ere sartu beharko dira. Eta neurri horietako lehenbizikoa da negoziazioa legezko foro batera eramatea, eztabaidatuko den guztia idatzita gera dadin.