2024-05-25
HomeUncategorizedEAEko Heziketa Bereziko langileek lanpostuen zerrenda eguneratzea eta hitzarmen berria eskatu dituzte...

EAEko Heziketa Bereziko langileek lanpostuen zerrenda eguneratzea eta hitzarmen berria eskatu dituzte Lakuan


Beste behin ere, legegintzaldia bukatzera doalarik, orain lau urte ginen leku berean aurkitzen gara Heziketa Bereziko langileak. Kolektibo hau espezialista, fisioterapeuta, lan-terapeuta, zeinu-hizkuntzako interpreteek eta logopedek osatzen dugu. 2004tik eguneratu gabe dagoen Lan Hitzarmen zaharkitu baten aurrean gaude, funtzio publikoko zaharrena, eta 2011ean Administrazioak eta sindikatu guztiok, hainbeste lan egin ondoren, adostu eta sinatu genuen aurreakordio batekin, baina Administrazioaren aldetik ez dago ausardiarik berriro heldu eta gauzatzeko.

Hezkuntza Sailak borondate eta hitz on asko ditu, baina, krisiaren aitzakian, Espainiatik datozen dekretuak eta aginduak aintzat hartu eta muturreraino aplikatzeko inolako zalantzarik gabe.

Hainbeste murrizketen ondorioz, Heziketa Bereziko langileon lan baldintzak prekarietate bidean jarri dituzte eta behar bereziak dituzten ikasleekiko lan kalitatea nabarmen kaltetu da.

Funtzio geroz eta asistentzialagoetara bueltatu gara, Europa mailan hainbat urtetan eredu izan garenean, atzera pausoak ari dira ematen, benetako eskola inklusibo baten kaltetan.

Borondate ona eta hitz itxaropentsuak jaso genituen baina horretan soilik geratu dira Administrazio honen ekintzak. Ezerezean, haizeak daramatzan hitzak bezala.

Konpromiso bakarra hartu zuen Administrazio honek, Lanpostuen Zerrenda eguneratzea. 2006tik eguneratu gabe dago hau, ondorioz, langile, zentro eta ikastetxe eta ikasleekiko ez egonkortasuna onartu da. Bi urteko bidea egin ondoren, Administrazio honek hori ere ez du lortu. Sail batetik bestera dabil gure lan zerrendaren proposamena bataren eta bestearen adostasuna eta aldeko informeak lortu nahian, linboan.

Beste kurtso bat langileek ezingo dutela lekualdatze duin batean parte hartu. Beste kurtso bat zentro terapeutikoek ez dutela langileen egonkortasunik izango ez baitira inongo lan zerrendetan azaltzen, Zeinu Hizkuntzako Interpreteei gertatzen zaien bezala. Beste urte bat non langile finkoek kilometro pila egin beharko dituzten dagozkien lantokietara iristeko… Honek guztiak ikasleekiko lan kalitateari zuzenean eragiten dio.

Administrazio honek Heziketa Bereziarekiko begirada berezia duela entzun izan dugu behin eta berriz, baina, beste behin ere, haizeak daramatzan hitzak baino ez dira. Heziketa Bereziko kolektiboa osatzen dugun langileekiko utzikeria nabaria da.

13 urte lan hitzarmen berririk gabe, 10 urte lanpostuen zerrenda eguneratu gabe, fisioterapeuten eta lan terapeuten homologaziorik gabe… Hori al da begirada berezia Administrazio honentzat?

LABek lanean jarraituko du heziketa bereziko langileok eskubidez merezi dugun guztia lortu arte, galdutakoak berreskuratu eta etorkizunari begira Euskal Herriak behar duen Hezkuntza propio baten alde tinko lan eginez.
 

 

 

AZKEN ALBISTEAK | ĂšLTIMAS NOTICIAS

Iruñea-Tuterako San Juan de Dios ospitaleko langileek ez dute “low cost” langileak izaten jarraitu nahi

Mobilizazioa egin dute Iruñeko Udaletxe plazan, zuzendaritzari negoziatu dezala eskatzeko. Enpresa-batzordeak 5 hilabete daramatza 2022ko abenduan bukatu zen hitzarmen kolektiboa berritu nahian. Soldata duinak eskatu ditu, bizitzaren garestitzearen eta KPIaren arabera eguneratutakoak.

Bergaran lan istripua izan duen langile bat oso larri dago

Atzo arratsaldean lan istripu larria gertatu zen Bergarako Embalan3 enpresan. Enpresako langilea, kamioi bat zamatzen ari zela, zama gainera erori eta azpian harrapatuta geratu zen. Une honetan langilea oso larri zaurituta dago erietxean.

Matia Fundazioko langileek hitzarmena negoziatu ahal izateko blokeoa etetea exijitu dute

Gaur kontzentrazioa egin dugu Matia Fundazioko langileekin batera, fundazioko zuzendaritza salatzeko asmoz, 2024. urtean hasitako negoziazio kolektiboa izoztuta dauka eta.