Esaerak dioen bezala “babesteko orduan, erasoa erabili”. Bada, Jon Darpón Osasun Kontseilariak zorrotz jarraitzen omen dio esaera honi. Inposaturiko murrizketen ondorioz Osakidetzaren egoera hain larria den honetan, Kontseilaria egoera estali nahian dabil mobilizazioetan parte hartzen dugun langile zein erabiltzaileon kontra jotzen. Ez da lehenengo aldia Darpon jaunak halako jarrera adierazten duena, egokiagoa agian tabernako eztabaida baterako bere karguari dagokion ardurari baino.
Ez da kasualitate hutsa elkarrizketaren erdia Osakidetzan barrena egunero egiten diren mobilizazioen kontra aritzeko erabili izana. Eguzkia estali nahi du hatzamar soil batekin.
Luze joko genuke Darponek botatako gezur guztiei erantzuna ematen, baina LABek argi utzi nahi du honakoa:
o Osasun sistema publikoak ez dira murrizketekin hobetzen. Murrizketek ez diete soilik eragiten lan eskubideei, ematen den osasun arretaren kalitate zein kantitateari baizik.
o Osakidetza eramaten ari diren amildegiak sortzen ditu protestak eta mobilizazioak. Ez soilik langileon aldetik. Kontseilariak eskaini beharko lieke pare bat minutu helarazi zaizkion milaka eta milaka erabiltzaileen murrizketen kontrako sinadurei.
o Osakidetzaren egoerari buruzko hitz egin nahi ez dutenak Darpon bera eta Osakidetzako Zuzendaritza dira. Ez dute negoziatzeko inolako borondaterik adierazi eta dakiten bakarra dekretuz dekretuz Madrilen edota berton erabakitako murrizketak ezartzea da.
o Ez al dago gaur prestazio eta pertsonal gutxiago orain dela urte batzuk baino? Darpón jauna, serioak izan gaitezen. Hobe genuke jende gutxiago kontratatzeko Osakidetzako direktiboek kobratu dituzten “pizgarriei” buruz arituko bazina.
Azkenik, gogorarazi nahi diogu Darpon jaunari mobilizazioek bai jarraitu dutela uda partean. Ez al du gogoratzen Gurutzetako Laborategien eraikin berriaren inaugurazioa, pasa den uztailean? Guk bai gogoratzen zaitugula, eta Urkullu lehendakaria, eta zuen bizkartzain guztiak gu bultzaka zerbitzuetako langileak eraikin berrian garbiketaren pribatizazioaren kontra burutzen ari ziren protesta oztopatu nahian.
Ez kezkatu, Darpon jauna. Hurrengo pankartan ikusiko dugu elkar.
Euskal Herrian, 2013ko urriaren 8an
{module[111]}