Hilabete honetarako deitutako bi greba egunetatik lehena egin dugu gaur Bizkaiko merkataritzan; hain zuzen ere, larrua eta oinetakoen merkataritza, ehun-merkataritza eta merkataritza orokorreko sektoreetan, langileek ez baitituzte hitzarmenak berritu 2007, 2014 eta 2018tik, hurrenez hurren.
LAB eta ELA sindikatuok deituta, piketeak egin ditugu goizean, eta, eguerdian, manifestazioa egin dugu Bilbon. “Badakigu merkataritza txikiak zailtasunak dituela, baina ez gaude prest bere irabazi-marjina gure kontura handitzeko. Merkataritza txikiko langileek kate handien eskubide berberak izan behar dituzte, eta sektoreko hitzarmena da hori bermatzeko tresna”, adierazi dute langileek.
Gaurkoan, %75%-%80ko jarraipena izan du grebak, eta, LABeko kide Irati Sienrak jakinarazi duenez, “langileak oso nekatuta eta haserre daude”. Izan ere, “merkataritza oso sektore prekarizatua da, soldata baxuekin eta lanaldi partzialekin”. Sienrak aldarrikatu bezala, “bada garaia hitzarmenak sinatzeko; egoera hau ez dugu nahi gehiago luzatu”·
Hurrengo greba eguna azaroaren 25ean izango da, hilabeteko bigarrena eta azken hilabeteetan egindako zortzigarrena.