Sindikatuon oharra, gaurko agerraldiaren harira:

Larrua eta oinetakoen merkataritzako, ehun-merkataritzako eta merkataritza orokorreko langileok ez ditugu gure hitzarmenak berritu 2007, 2014 eta 2018tik, hurrenez hurren. Denbora horretan, gure soldatak izoztuta mantendu dira, Lanbide arteko Gutxieneko Soldatatik gertu, bizitza etengabe garestitzen den bitartean. Ez da neurririk hartzen behin-behinekotasuna eta partzialtasuna geldiarazteko, eta ez dira eguneratzen sektorea eraldatzen ari den online salmentaren baldintzak. Sektoreko gehiengoa zaintza-kargak dituzten emakumeak gara, baina merkataritza-ordutegiek eta ustezko uztartze-neurriek ez dituzte gure benetako beharrak asetzen.

2019az geroztik ari gara negoziatzen, baina patronalak erosteko ahalmena galtzea dakarten igoerak zein guretzako garrantzitsuak diren eskubideei uko egitea planteatzen dituzte.

LABek eta ELAk hurbileko merkataritza txikia defendatzen dugu kontsumo arduratsuaren eredu gisa. Horregatik, bai astero mobilizatu garen 4 hilabeteetan zehar, bai egin ditugun zazpi greba-egunetan ere, kate handietan eta merkataritza-guneetan jarri dugu arreta.

Baina CECOBI eta Bizkaidendak patronaletako enpresa eta elkarte bazkideak, batez ere, saltoki txiki eta ertainak dira, eta horrek mugitu gabe eroso egotea eragiten du, grebek beste enpresa batzuei eragiten dieten bitartean.

Badakigu merkataritza txikiak zailtasunak dituela, baina ez gaude prest bere irabazi-marjina gure kontura handitzeko. Merkataritza txikiko langileek kate handien eskubide berberak izan behar dituzte, eta sektoreko hitzarmena da hori bermatzeko tresna.

Horregatik, hemendik aurrera, CECOBI eta Bizkaidendak elkarteetako bazkideen ateetan ere mobilizatuko gara, hitzarmenen negoziazioa blokeatzen eta sektoreko langileak pobretzen ari direlako.

Ehun, larru eta oinetakoen merkataritzako eta merkataritza orokorreko hitzarmen duinen alde, azaroak 4 eta 25ean, GREBA!