Mobilizazioa egin dugu El Corte Ingles-eko Enplegu Erregulazioko Espedientea salatzeko. Hain zuzen ere, kaleratze eta prekarizazioaren kontra protesta egin dugu Bilboko saltokiaren aurrean. “Hemen ez dago langilerik soberan, pertsonal faltan gaude. Lan karga etengabe ari da handitzen”, adierazi dugu.

LABek mobilizazioa egin du gaur Bilboko El Corte Ingles-en lan-zentroaren aurrean. Salatu du enpresak EEEa arrakastatsutzat saldu nahi duen arren, borondatezko fasea ezagutzen ez diren alderdi askorekin amaitu dela. Gainera, adierazi du enpresak digitalizazioa erabili duela lan-baldintzak baldintzatzeko aitzakia moduan.

LABetik adierazi dute El Corte Inglesek ezarritako neurriak ez direla digitalizazioa edo pandemiaren ondoriozkoak, enpresak aspalditik bultzatu nahi duen negozio ereduagatik baizik: asteburu eta igandeetako kontratazio prekarioak ateak itxita soilik on-line salmenta prestatzeko; gero eta katalago zabalagoa interneten eta txikiagoa dendetan; langileen murrizketa, ordezkapen falta, aldi baterako kontratuak ez luzatzea. EEEa pauso erraldoia da bide honetan. 

Gainera, prozesu hau ematen da langileen lan-baldintzak neurri handian prekarizatzen zituen lan-baldintzen funtsezko aldaketa bat sinatu ondoren, trukean lanpostuei eutsiko zietela zehazten zuena. Urtebete ere ez da pasatu eta enpresak 3.000 langile baino gehiagori eragiten dion EEEa aurkeztu du. 

EEEaren kontra dago LAB eta uste du digitalizazioari aurre egiteko beste bide batzuk daudela, eta El Corte Ingles-ek pertsonal gastuak murriztearen alde egin duela irabaziak handitzen jarraitzeko. EAEn sostenguko 37 lanpostu ezabatu nahi zituen enpresak. Hemen ez da boluntariorik egon, baina bai aldiz salmenta arloan. LABek eskaera horiei ezetza ematea eta kaleratzeekin aurrera jarraitzea zentzugabekeria dela jakinarazi dio enpresari eta honek ziurtatu du ez dela derrigorrezko kaleratzerik egongo. 

Sindikatuak kezka adierazten du sostenguan zeuden langileak geratuko diren egoeraren inguruan eta ohartarazten du onartezinak izan litezkeen aldaketak planteatu daitezkeela, langileek eurek lanpostuak uztea ekar dezaketenak, antzeko EEE prozedura batzutan gertatzen ari den moduan, hala nola Inditex edo H&Mn. Ez dira behartutakoak izango, baina badago lanpostuak zeharka suntsitzeko arriskua. Horregatik, LABek bermeak eta konpromisoa eskatzen dizkio enpresari.