Datozen maiatzaren 3an eta 5ean bi greba egun zeuden deituta, enpresak langileen gehiengoari egiten dion tratu txarra salatzeko eta langileen aldarrikapenak aintzat hartuko dituen eraginkortasun orokorreko itun baten alde egiteko. Hala ere, enpresako zuzendaritzak lan-giroa hobetzeko neurri zehatzak onartu izanak greba bertan behera uztea ahalbidetu du, eta Enpresa Ituna berritzeko negoziazioei berrekiteko aukera zabaldu du. LAB pozik agertu da ekintza sindikalaren bidez lortu delako egoera berbideratzea.
Huerta de Peralta Azkoiengo enpresa ezaguna egin zen 2018-2019 neguan langileek egin zuten 28 eguneko grebarengatik. Greba hura langileek irabazi zuten, enpresarekin akordioa eginda, baina, ordutik, langileekiko tratu desberdinek eta eguneroko izapide oinarrizkoenetan beren eskubideak praktikan jartzeko zailtasunek plantillaren haserrea eragin izan duen giro itogarriaren aurrean, langileen batzarrak erabakia hartu zuen grebaren bi egunak deitzeko.
Grebaren deialdia publiko egin eta berehala, enpresa mugitzen hasi zen. Eta apirilaren 29ko arratsaldekaren hasieran zuzendaritzak eta Greba Batzordeak lehen bilera bat egin ondoren, negoziazioak hasi ziren zuzendaritza eta LABen artean, eta, hainbat proposamen eta kontraproposamen trukatu ondoren, apirilaren 30eko arratsaldeko azken orduan Greba Batzordeak proposatutako neurri zehatz gehienak jasotzen dituen akordio batera iritsi dira.
Aipatutako akordioaren arabera, enpresa-zuzendaritzaren eta langileen arteko komunikazioa errazteko mekanismoak ezartzen dira, gatazka-egoerak saihesteko balio beharko dutena; horrela, lan-harremanak ezaugarritzen ari diren tentsioa murrizten lagunduko dute.
Era berean, greba bertan behera uzteko akordioak berekin dakar lantokiko lan-baldintzak arautzeko negoziazioei berrekitea. LABek eraginkortasun orokorreko enpresa-itun baten alde egiten jarraituko du, langileek batzarretan adierazi dituzten aldarrikapenak jasoko dituena, Nafarroako Nekazaritza eta Abeltzaintzako Hitzarmen Kolektiboaren baldintzak hobetzeko.