ADEGik gaurkoan, maiatzak 17, proposamen bat aurkeztu du papergintzako Gipuzkoako negoziaketa mahaian, bi hilabetetan zehar hainbat bilera egin ondoren.
LABen ziur gaude mobilizazio bidez eragindako presioa izan dela Adegik proposamena aurkeztu izanaren arrazoia. Bileran bertan ADEGIk esan duen moduan, proposamenak, ohituraz, askoz beranduago, beti urrian edo azaroan aurkeztu izan dituzte. Ez dute langileenganako begirune eza ezkutatzen. Hau da ADEGIren benetako aurpegia.
Aurkeztu duten proposamena aztertuta, sindikatuen proposamenetan jasotako hainbat gai ez dituela jasotzen ikusi dugu, erabat ez nahikoa da proposamena, eta jasotzen dituen gai asko legeak ezarritakoak besterik ez dira. Hortaz, ez dugu ontzat jotzen proposamen hau, nahiz eta mahaian negoziatzen jarraitzeko aukera ematen duen.
Denbora irabazteko eta mobilizazioak eragozteko trikimailu bat ez izatea espero dugu. Horregatik, bilera egutegi bat eskatu diogu, ADEGIren benetako borondatea egiaztatu ahal izateko. Asteazkenean sindikatuak bilera egingo dugu egoera aztertzeko.
Bide onetik goaz baina asko falta da oraindik. Mobilizazioa eta presio gaitasuna dira gakoak. Honela jarrai dezagun.