Gaur ere, joan abenduaren 5 eta 10ean bezala, greba eguna da Ipar Euskal Herrian. Hain zuzen ere, Baionako kaleak hartu ditugu Macronen Gobernuak sustatutako erretreten erreforma salatzeko. LABeko idazkari nagusi Garbiñe Aranburu izan da Baionan, eta pentsio sistema propio bat edukitzeko beharra aldarrikatu du, pentsio sistema publikoa erasotzen ari diren honetan.
"Pentsio sistema erasotzen ari dira. Pentsio sistema propio bat eraikitzeko beharra dugu; ezinbestekoa iruditzen zaigu Euskal Herriko langileok bertan erabaki ahal izatea gure pentsio sistema zein den, lan harremanekin edo babes sozialarekin egin beharko litzatekeen bezala".
Garbiñe Aranbururen hitzak dira hauek, Baionako manifestazioa hasi aurretik egindakoak. Lehenago, LABeko idazkari nagusia Euskadi Irratiko Baionako estudioetan izan da, eta, bertan egindako elkarrizketan, mobilizazio sozialaren garrantzia nabamendu du: "Protesta sozialik ez badago, aldarriek ez dute lekurik hartzen agenda politikoan".
Zentzu honetan, datorren urtarrilaren 30eko Greba Orokorrerako deia egin du Baionako mobilizazioan, lan, pentsio eta bizitza duinaren alde egiteko balioan jarri beharreko mugarria delako.