LABek Boulervardean ekintza bat egin du, berriki, Arabako ostalaritzako hitzarmenaren ELA, CCOO eta UGTren sinadura salatzeko, erosahalmena bermatzen ez duelako eta sukaldaritza arlo modernoko langileak kanpoan uzten dituelako.
Patronalak ELA, CCOO eta UGTrekin sinatu du Arabako ostalaritzako hitzarmena. Hitzarmenak ez ditu langileen beharrak bermatzen, negoziazioan LABek behin baino gehiagotan adierazi duen moduan.
Alde batetik, LABek salatu du adostutakoak ez duela langileen erosahalmena bermatzen. Izan ere, 2020tik orain arteko atzerapenak galtzen dira, eta, gainera, jasotako igoera %17,6koa da, baina metatutako KPIa %18,1ekoa. Ezin da ahaztu ez dagoela jardunaldiaren jaitsiera errealik; bi orduko jaitsiera adostu dute, besterik ez.
Beste alde batetik, eta larriena dena, langile asko hitzarmenetik kanpo utzi dituzte ELAk, CCOOek eta UGTek sinadura honekin. 2022an ostalaritzako kate eta marka handien estatuko patronalak estatu mailako hitzarmen berri bat asmatu zuten, Madrilen negoziatu eta CCOO eta UGT sindikatuekin sinatu. Sektoreko 140.000 langileren lan baldintzak okertu egin dira, eta prekarietatera kondenatu.
Azken finean, lan bera da, baina lan baldintza okerragoetan:
| SINATUTAKO ARABAKO HITZARMENA | ERRESTAURAZIO MODERNOA | |
| Urteko jardunaldia | 1.744 ordu | 1.800 ordu |
Zerbitzariaren soldata | 1.577,99€/hilabete 24.524,17€/urte | 1.285€/hilabete 18.000€/urte |
| Aparteko pagak | 3 | 2 |
Aparteko orduak | 19,72 | 0 |
Gainera, negoziazio osoan zehar ez da mobilizazio eta borroka nahikoa piztu. LABek behin baino gehiagotan sindikatu guztion artean mobilizazioak egiteko apustua egin du, baina beste sindikatuak ez ditu bidelagun izan apustu horretan.
LABek argi adierazi izan du borrokaren bidez hitzarmen duin bat lortzeko aukera zegoela, sektoreko langile guztiak barnebilduko zituena. Horregatik, LABek elkarretaratzea egin du, berriki, Boulevard kanpoan, eta, ondoren, sukaldaritza arlo modernoko langileei informazioa eman die eta egoera salatzen duen pankarta bat eskegi du amaieran.