Gasteizko parkeen, lorategien eta eraztun berdearen mantentze-zerbitzuko langileek, Enviser enpresak azpikontratatutakoek, bost hilabete egin dituzte greban. Gasteizko Udalak azpikontratatutako langileek bizi duina bermatuko dien hitzarmen propioaren aldeko mobilizazioak hasi zituzten duela sei hilabete, eta salatu zuten lorezaintzako estatu hitzarmena aplikatzen dietela, eduki eskasak dituena eta hemengo beharrak kontuan hartzen ez dituena. Euren lan baldintzak negoziatzeko gaitasuna izatea aldarrikatzen zuten, baina enpresa batzordeak egindako eskaerei itxikeriaz erantzun zieten enpresak eta Gasteizko Udalak. Horren aurrean, grebara jo zuten langileek, eta hamaika mobilizazio egin dituzte ordutik. Udalak eta Enviserrek, baina, langileen eskariei muzin egin die etengabe, eta, gatazka konpondu beharrean, bere baldintzak langileei ezartzen ahalegindu da.
Jarrera arduragabe horren aurrean, langileek grebarekin eta mobilizazioekin jarraitzeko borondatea dutela argi erakutsi dute. Udala bere ardura saihesten saiatu da, baina udala bera da azpikontratazen duen enpresaren erantzule, eta, horregatik, enpresa batzordeak neurriak berehala hartzeko aldarrikatu izan dio behin eta berriz. Etsigarria da erantzuna, ordea. Izan ere, mahai gainean jarritako proposamenak ez dira, inondik inora, onargarriak.
Langileek bizi maila duina bermatuko dien hitzarmena lortu arte borrokan jarraitzeko determinazioa dute, eta, horren erakusle, pankarta handi bat eskegi dute gaur goizean, greban bost hilabete egin dituzten egunean.