Gaur goizean Ertzaintzak, LAB sindikatuko Eskumaldeko Industria arduradun Aritz Azkona Dominguez jipoitu eta erretenitu du. Egin duen bakarra Irizar Group Taldekoa den Berangoko Alconza enpresan greban dauden langileekin batera kontzentrazio batean parte hartzea izan da. Jipoien ondorioz ospitalera joan behar izan du.
Ertzainek gogor jipoitu eta erretenitu dute, eta gerora aske utzi duten arren, auzibidea irekitzeko mehatxua egin diote. Zorionez ikusi ahal izan diren irudiek argi erakusten dute erasotzaile bakarrak ertzainak izan direla, eta izatekotan hauek izan beharko luketela epaituak.
59 egun daramatzate Alconzako langileak greban. Aste honetan enpresak produkzioari berrekin nahi izan dio. Astelehenetik hasita, Ertzaintzak jarrera erasokorra eta bortitza izan du grebalarien eta elkartasuna adieraztera joan diren herritarren aurka.
LABentzat ez da zorizkoa Azkonari emandako jipoia eta Ertzaintza lan gatazketan edukitzen ari den jarrera. Eusko Jaurlaritza, lan gatazketan enpresarien alde lerratzea nahikoa ez dela konturatu da. Izan ere, Tubacex edo PCB moduko lan gatazketan, kaleratzeak publikoki babestu dituzten arren, langileek ez dute etsi eta borrokan jarraitu dute.Hortaz,Jaurlaritzakerabakidulangatazketanpoliziaerabiltzealangileenkontra .
LAB sindikatuko kideen kontrako isun, mehatxu eta jipoiak ugariak izaten ari dira lan gatazketan, funtsezko eskubideak urratzen ari zaizkie. Konfrontaziozko sindikalismoa da gurea, eta langileen lan eta bizi baldintzen defentsan lehen lerroan egon garela eta egongo garela demostratu dugu, eta patronala zein Eusko Jaurlaritza horren beldur dira.
LABek, borrokan diren langileei elkartasuna adierazteaz gain, Azkonaren kontrakoa erasoa ikertu eta bere kontra auzibiderik ez irekitzea exijitzen dugu. Ertzaintza LABen eta langileen kontrako tresna moduan ez erabiltzeko exijitzen diogu Eusko Jaurlaritzari.
Sindikalismo borrokalariarekin horrela amaitu nahi badute, jai dute. Alconzan kaleratzerik ez!