Osakidetzaren lehen mailako arretaren egoera jasanezina da langile zein herritarrentzat, eta halaxe salatu dugu osasun etxeen aurrean, LAB, SATSE, ELA, CCOO eta UGT sindikatuok deitutako mobilizazio egunean.
Pandemiak are gehiago tenkatu du lehen ere hilzorian zegoen asistentzia-maila honen egoera; izan ere, arazoak egiturazkoak dira, eta egungo osasun-krisia baino askoz sakonagoak eta zaharragoak. Hala ere, pandemia hau, kolektiboaren lan-baldintzak eta herritarrei eskaintzen zaien asistentzia-kalitatea are gehiago prekarizatzeaz gain, Osakidetzak murrizketak aplikatzeko eta pazienteak osasun publikora iristea zailtzeko aitzakia ere bihurtu da.
Horrek guztiak, planifikaziorik, errefortzurik eta inbertsiorik ezarekin eta pandemiaren kudeaketak eragindako lan-karga handitzearekin batera, soken aurka jarri du Lehen Mailako Arreta. Lehen Arreta eraisteko programatutako estrategiak aurrera jarraitzen du, eta Osakidetzak COVID 19arekin egiturazko defizita estaltzen jarraitzen du.
Ikastetxeetan ere
LAB sindikatuko Irakaskuntza arlotik ere bat egin dugu mobilizazio egunarekin, eta ikastetxeetan ere protestak egin ditugu, “Osakidetzako murrizketek Hezkuntza ere gaixotzen dute” leloarekin; mobilizazio egunaren argazki bilduman ikus daitezke horietako batzuk.
Bestalde, egunaren lehen zatiko protestez gain, mobilizazio egunaren harira, arratsalderako ere deituak zeuden mobilizazioak herrietan.
