Abenduaren 3ko gauean, B.O.M. 44 urteko Markinako langile eta LABeko afiliatua hil zen Bergarako Fagor Ederlan lantokian, lan istripu ez traumatiko batean. Gainera, abenduaren 2tik 3rako goizaldean, 23 urteko emakume langile bat hil zen lanerako bidean, Cadreitan izandako auto istripu batean. Azken hauekin, aurten jada 59 langilek galdu dute bizitza Hego Euskal Herrian euren lanpostuetan, horietatik 15ek lan istripu ez traumatikoetan.
Ezer baino lehen, LAB sindikatutik gure doluminik zintzoenak helarazi nahi genizkieke hildako langileen lankide, lagun eta senitartekoei.
Bergarako heriotza hau ezin diogu halabeharrari egotzi. Oso irakurketa sinplista izango litzateke hori. Behin baino gehiagotan salatu izan dugu txanda sistemak eta bereziki gaueko lanak osasunean eragiten duen kalte fisiko eta psikologikoa: erritmo zirkadiarra kalteten du (gizakion prozesu fisiologikoak kontrolatzen duen giza erloju biologikoa) eta horrek hipertentsioa, estresa, nekea, insomnioa eta beste hainbat patologia eta arrisku sortzen ditu.
Argi daukagu baita ere, lantokietan egiten diren arriskuen ebaluazioetan ez direla jasotzen lanak errealki sortzen dituen patologia guztiak eta beraz, ez dela lan osasunaren zaintza integral eta eraginkor bat egiten. Hainbat eta hainbat gaixotasun profesional daude, isil isilean eta inor konturatu gabe langileen osasuna kaltetzen dutenak, eta kasu askotan langileari heriotza dakarkiotenak.
Bada ordua langileon osasuna eta bizitzak aintzat hartuko dituen prebentzio politika eraginkor baten kultura sustatzeko eta langileon lan eskubideak defendatzeko. Hor uste dugu administrazio publikoek erantzukizun handia dutela.