Bershkako langileak Bilbon mobilizatu dira, enpleguaren defentsan. Hain zuzen ere, Bilboko Zubiarte merkatal-zentrotik abiatu dira protestan, eta Gran Via 16an kokatutako Bershkara ibilbidea egin dute.
Bershkako Bizkaiko enpresa-batzordearen oharra:
Inditexek maiatzean iragarri zuen online salmentaren aldeko apustua egin eta 2023ra arte dendak ixteari ekingo ziola. Azken hilabeteotan itxiera desberdinak egin ditu, baina lehen itxiera olatu handia urtarrilean dator. Bershkari dagokionez, Hego Euskal Herrian, denda bakarra itxiko du, Bilboko Zubiarte merkatal zentroan kokatutakoa, baina ezin dugu ahaztu duela urtebete hain justu, Artea merkatal zentroko denda ere itxi zuela.
Itxiera honek ez die arrazoi ekonomikoei erantzuten: enpresa ekonomikoki oso ondo doa. Ezin dugu ahaztu, Inditex-eko kateek ez dutela ABEEErik egin eta, beraz, ez direla irabaziak banatzeko mugei lotuta egon, ezta kaleratzeak egiteko debekuari ere. Bi hilabetez soldatak mantentzearen truke, eskuak aske dituzte urratsak emateko. Hala ere, Bershka zein Inditexeko gainerako kateentzako irudia oso garrantzitsua da, hortaz, ez dituzte zuzenean kaleratzeak egingo: itxierak kaltetutako langile guztiei enpresa-taldean lanpostua bermatuko diela ziurtatzen du. Hori bai, ez du lanpostu hori Bershka edota norbere bizilekutik gertu izango denik ziurtatzen. Beraz, enplegua bermatzen digute, baina Badajozera, Andaluziara edo Madrilera bizitzera joateko prest baldin bagaude. Bizkaiko Kiddy Ģs Class-etan gertatutakoa horren froga da.
Gure ustez, lan harremana etetearen erabakia langileon gain uztea ezkutuko EEE bat besterik ez da. Jakin badakigu, lanpostuak Bizkaiko dendetan sobera daudela: konfinamendua altxatu zenetik, enpresa ez dabil kontratazioak egiten eta aldi-baterako kontratuak ez ditu luzatu. Lan kargaz lepo gaude. Beraz, Zubiarteko dendako langileak gainerako dendetan birkokatzea zentzuzkoa eta erraza da. Ezin dugu ahaztu, gainera, enpresarentzako horrek ez duela ia eragin ekonomikorik: Bershkaren gastu guztien %8 besterik ez dira soldata-gastuak.
Bershkako Bizkaiko Enpresa batzordean ordezkaritza dugun LAB (4) eta ELAk (2) kaltetutako langileentzako lanpostuak Bizkaian bertan bermatzea ziurtatzeko mobilizatzen hasiko gara.