2020. urtea amaitzear da, eta amaituko da Arabako mahai negoziatzailean negoziazio errealik hasi gabe. Urte eta erdi pasa da mahaia osatu zenetik. Ordutik, behin eta berriro argi geratu da patronalak ez duela inongo asmorik sektoreko lan baldintza duin minimorik adosteko. Ez dago ados eros ahalmena ez galtzearen atalean, sikiera.
Urte honetan zehar, eta Covid-19 dela eta izandako alarma egoerak bultzatutako geldialdia dela eta, negoziazioa arriskuan zegoen, ultraktibitatea ekainaren 30ean amaitzen baitzen. Nahiz eta aurreko hitzarmena ez sinatu, eta gainera berorren edukiekin oso kritikoak izan, gainontzeko sindikatuekin batera 6 hilabeteko luzapena adostu genuen akordioa lortzera bidean. Baina ezinezkoa izan da.
Oraingo honetan, ultraktibitatea mugagabea izatea proposatu dugu bi arrazoirengatik:
-Ulertzen dugu epeka ultraktibitatea luzatzeak patronalari beto aukera ematen diola, uneren batean “orain ez dut behar” esan dezakeelako.
-Negoziazioa bera bizkortu dezake, oztopo bat erditik kentzen duzulako. Azken hilabeteetan, eta batez ere alarma egoeraren geldialdia eta uda ostean, elkarrizketak kontzeptu honen ingurukoak izan dira batez ere. Sektoreari, eta bereziki kontratazio berriei egonkortasuna eskaintzen badiegu, prozesua askoz garbiagoa eta azkarragoa izan daiteke. Baina, badirudi ez dela interesgarria.
Gainera, esan behar da lehen luzapenaren ostean, SEAk aurkeztu zuela hasierakoa baino okerragoa zen plataforma, eta aurpegia dute guri leporatzeko ez garela gure proposamenetan mugitu.
Egoera honetan, gainontzeko sindikatuek patronalak proposatu duen urtebeteko luzapena sinatu dute.
Guk argi dugu ultraktibitatearen garrantzia, eta horregatik gure plataforma guztietan sartzen dugu, egonkortasuna eskaintzen duelako eta gainera estatalizazioaren aurrean harresia delako. Baina ez edozein prezioetan, eta are gutxiago patronalaren nahieran.
LABetik behin eta berriro errepikatuko dugu edukiak izango dituen hitzarmena berritzeko bidea sektorean lan egiten duten langileen mobilizazioaren eskutik baino ez dela lortuko, eta ideia horretan tematuko gara.
Baina onartu behar dugu ere zaila izango dela, badaudelako sindikatu batzuk ez dutela onartzen mahaian dauden gehiengoak, eta gehiengoa duen sindikatuak oraindik ez diolako erantzun otsailean egin genien elkarrekin mobilizatzeko proposamenari.