Argi dago langileoi borroka beste biderik ez zaigula gelditzen. Horregatik, bihar FVEMen aurrean egingo dugun mobilizazio iraunkorrean parte hartzera deitzen ditugu langile guztiak, baita datozen egun eta asteetan egongo diren deialdietan ere.
Bizkaiko Metalgintzako negoziazio mahaiaren bilera egin da gaur,eta FVEMek gatazka bukatu eta benetako negoziazio baten alde ez egiteko duen jarrera nabarmena izan da. Azken bi bileretan sindikatuok urrats garrantzitsuak eman ditugu eta proposamen berriak jarri dizkiogu mahaiaren gainean:
1. Berdintasuna. FVEMen azken proposamena oinarri hartuta, egingarri eta betebeharrezkoa izateko beharrezko edukia gehitu genion.
2. ABLE bidezko kontratazioan hamar eguneko kontratuak onartzeko prestutasuna adierazi genuen.
3. Enpresetan malgutasuna erabili ahal izateko, behin behineko kontratazioaren portzentaia %12ra igo genuen.
4. Langileon lan osasuna bermatzeko eta zaintzeko beharrezko neurriak aurkeztu genizkion.
Horrekin guztiarekin batera, bi eskaera zuzen eta ezinbesteko ere mahai gaineratu genizkion:
1. Lan Osasuna zaindu behar denez eta alor honetan eskubideak lapurtzea onartuko ez dugunez, IT osagarrietan proposatu duten atzera urratsa mahai gainetik kendu dezatela lehenbailehen.
2. Subrogazioan egin zuten proposamena, ez subrogatzeko klausula bat denez (jarri dituzten muga eta baldintza guztiekin, ez baitio ia inori ere eragingo), benetako proposamen egingarri bat egiteko eskatu genien.
Gaurko bileran, hau izan da FVEMen erantzuna:
1. Berdintasuna: gaurko erantzun behar zutena, ostiralean ekarriko omen dute; baina gaur aurreratu dute borondatean oinarritutako proposamena izango dela berriro ere, ez dute derrigortasunik onartu nahi.
2. ABLEak: gaurko erantzun behar zutena, begiratuko dutela. Hala ere, sindikatuon proposamenak ez diela balio diote.
3: Behin behineko kontratazioa: gaurko erantzun behar zutena, begiratuko dutela. Hemen ere, sindikatuon proposamenak ez die balio.
4. Lan Osasuna: proposamena egingo dutela azaroaren 21 inguruan.
5. IT osagarriak: langileon osasunarekin negoziatu nahi dute eta ez dute atzera bota.
6. Subrogazioa: enpresek ez dietela puntu honetan negoziatzen uzten esan dute. Hala ere, harrigarriena da ez zekitela ongi sindikatuok subrogazioarekin zer den eskatzen duguna (urte eta erdi beranduago dator hau…). Beraz, zer da enpresei azaltzen dietena?
Horregatik guztiagatik, gaurko bileratik bi ondorio garbi atera ditugu. Batetik, patronalak ez du negoziatzeko borondaterik; ez du ezertan urratsik eman, ez du planteamendu berririk ekarri. Eta bestetik, gatazka denboran luzatu nahi du. Izan ere, berdintasuna, ABLE eta behin behinekotasun gaietan erantzungo zutela esan bazuten ere, gaur ez du ezer erantzun, baldin eta aho txikiz ezezkoak esateko ez bada izan.