2024-02-27
HomeIdazkaritzakEuskara IdazkaritzaZarauzko osasun etxean Osaskidetzak ez du euskara plana betetzen

Zarauzko osasun etxean Osaskidetzak ez du euskara plana betetzen

Osakidetzaren euskara planak jasotzen duenaren aurka Zarauzko osasun zentroan eman den jubilazioa baten aurrean lanpostua betetzeko euskararen ezagutza egiaztatzea ez du beharrezkotzat hartu zuzendaritzak. Erabaki honen aurka azaldu dira UEMA, Zarauzko Udala, Zarauzko Euskal Herrian Euskaraz, Urola Kostako LAB, Zarauzko Ikastola eta Zarauzko AEK.

UEMA , Zarauzko Udala, Zarauzko Euskal Herrian Euskaraz, LAB Urola Kosta, Zarauzko Ikastola, Zarauzko AEKren irakurketa

«Behean sinatzen dugun eragileok gure desadostasuna adierazi nahi diogu Osakidetzari Zarauzko osasun zerbitzuaren kalitatean eragin zuzena izango duen, eta, ondorioz, zarauztarroi zuzenean eragingo digun erabakiak hartu dituelako. Bi izan dira ezinegona sortu diguten erabakiak. Zarauzko osasun zentroan lan egiten zuen mediku batek jubilazioa hartu zuen maiatzean. Titularrik gabe dagoen postu horri, Osakidetzaren euskara planak jasotzen duenaren aurka, ez zaio euskara ikasteko derrigortasun-datarik jarri eta lanpostua betetzeko barne prozesua abiatu du Gipuzkoa Eskualdeak. Ondorioz, lanpostua betetzeko euskararen ezagutza egiaztatzea ez da beharrezkoa izango. Eta hori gutxi ez balitz, baja hartu duen emaginaren ordez, erdalduna ekarri dute. Horiek horrela, zarauztarroi euskaraz artatuak izateko zailtasunak areagotuko zaizkigu aurrerantzean.

Hainbat arrazoirengatik iruditzen zaigu kezkagarria Osakidetzak hartu duen erabakia:

– Administrazio publikoak zerbitzuak euskaraz eskaintzeko duen betebeharrari muzin eginda, Zarauzko herritarron hizkuntza eskubideak urratuko ditu Osakidetzak.

– Osakidetzak ez ditu kontutan hartu Zarauzko herritarrak, ezta bertako errealitate soziolinguistikoa ere.

– Zarauzko euskararen arnasgunean erdara nagusi den eremu bat sortuko du Osakidetzak, bertako errealitate soziolinguistikoan eragin kaltegarria eraginez. Bertako herritarren %70ek daki euskaraz, eta %17k euskara ulertzen du. Euskara nagusi izanik, euskararen arnasgune indartsua da gure herria.

– Kalitatea da Osakidetzaren helburu nagusietako bat, eta kalitatea osasungintzan hizkuntzari lotuta dago. Jon Darpon Osasun sailburuak adierazi zuen moduan, osagile eta pazientearen arteko harremanean konfiantza eta enpatia lortzeko hizkuntza funtsezkoa da. Kontraensakorra, beraz, hartutako erabakiekin.

Arnasguneek hizkuntzaren biziraupenean egindako ekarpena handia izan da, eta handia izan daiteke euskararen normalizaziorako egin dezaketen ekarpena ere. Udalerri euskaldunak bereziak dira hizkuntzaren ikuspegitik, eta ondorioz, trataera berezia behar dute; bertako errealitate soziolinguistikoan eragiten duten faktoreak zaindu behar dira. Beste hainbat arlotan bezala, hizkuntzari dagokionean ere, kaltea eragin aurretik prebentzio politikak aktibatu behar dira. Egoera honen aurrean gure kezka eta ezinegona adierazi nahi dugu. Hori horrela, orain arteko prozedura berrikusi, eta lanpostuari derrigortasun data jar diezaioten eskatu nahi diegu Osakidetzako arduradunei. Zarauzko herritarrok osasun zerbitzuak euskaraz jasotzeko eskubide osoa daukagu, eta beraz, zor zaigun begirune eta errespetuarekin jokatu dezala eskatzen diogu.

Sinatzaileak:

UEMA
Zarauzko Udala, Zarauzko Euskal Herrian Euskaraz, LAB Urola Kosta, Zarauzko Ikastola eta Zarauzko AEK»
 

 

 

AZKEN ALBISTEAK | ĂšLTIMAS NOTICIAS

Martxoaren 3ko ekintza bateratuak aurkeztu ditugu

Datorren igandean betetzen dira 48 urte martxoaren 3ko sarraskitik. Eta gaur, agerraldia egin dugu LAB, ELA, ESK eta STEILAS sindikatuok, Martxoak 3 elkartearekin batera, igandean egingo ditugun ekintzak aurkezteko. 12:00etan, ekitaldia egingo dugu Plazan, monolitoaren ondoran, eta 12:30ean, bertatik abiatuko da Gasteizko kaleak zeharkatuko dituen manifestazioa.

Osakidetza eta garbiketa enpresa esleipendunei eskatzen diegu uztailean sinatutako aurreakordioa bete dezatela

Joan den udan, Osakidetzak azpikontratatutako garbiketa-zerbitzuko langileek egindako borroka eredugarri eta duinaren ondoren, enpresa esleipendunak eta gehiengo sindikala aurreakordio batera iritsi ginen. Bertan, sektoreak hitzarmena berritzeko egin zituen aldarrikapen nagusiak jaso genituen: bertako langileen baldintzen homologazioa blindatzea, karrera profesionala eskuratzea, txanda-kontratua eskuratzea, bakanteen arautzea…

LABek Nafarroa Garaian inoizko emaitzarik onenak lortu zituen 2023ko hauteskunde sindikaletan: 1.223 delegatu ditu eta %18tik hurbil dago

Nafarroako Gobernuak azkenean zabaldu dituen emaitza ofizialen arabera, LAB sindikatuak maximo historikoak lortu zituen 2023ko hauteskunde sindikaletan. Azken datuen arabera, LABek 1.223 delegatu ditu Nafarroa Garaian, eta %17,96ko ordezkaritza. Lau sindikatu nagusien artean, azken urtean LAB izan da delegatu kopuru gehien lortu dituena, bai eta ehunekoan gora egitea lortu duen bakarra ere.