2024-03-02
HomeUncategorizedZabaltzen jarraitzen dugu Ipar Euskal Herrian, Funtzio Publikoko hauteskundeetan emaitza oparoak lortu...

Zabaltzen jarraitzen dugu Ipar Euskal Herrian, Funtzio Publikoko hauteskundeetan emaitza oparoak lortu eta gero

LABek ordezkaritza lortu du Hendaia, Kanbo eta Urruñako udaletan, baita Ipar Euskal Herriko Hirigune Elkargoan eta Ipar Euskal Herriko Kostaldeko Ospitalgunean ere.

Baionako ospitaleko kasuan, lehen aldia da bertan aurkeztu garela, zuzendaritzak jarritako oztopoen gainetik, aurkezterako garaian ez baitzuen gure zerrenda onartu. Paueko Administrazio Auzitegira jo genuen, ordea, eta epaitegiak arrazoia eman eta hauteskundeetan aurkezteko eskubidea genuela berretsi zuen. Bada, delegatu bat lortu dugu bertan, 91 boto eskuratu eta gero; botoen %7, hain justu.

Ipar Euskal Herriko Hirigune Elkargoan ere LABek izango du ordezkaritza. 2 delegatu lortu ditugu, eta bigarren indar sindikala izango gara. CFDT lehen indarra da bertan, 3 ordezkarirekin. CGT sindikatuak bakarra izango du.

Udalei dagokienez, lehen aldia da Urruñako Udalean hautagaitza aurkeztu dugula, eta sindikatu bozkatuena izan gara bertan, CGT sindikatuaren aurretik. 2 delegatu izango ditugu, bozken ia %70 lortu eta gero, 58 boto eskuratuta. CGT-ek delegatu bakarra izango du, 25 boto lortu eta gero.

Kanboko Udalean, LABek eskuratu ditu bertako 3 delegatuak. Hendaiako Udalean, berriz, 2 delegatu lortu ditugu. Kasu honetan, CGT sindikatua da lehen indarra, 3 delegaturekin.

LABen presentzia Ipar Euskal Herrian gero eta nabarmenagoa izateaz gain, ordezkaritza izan ohi dugun lantokietan indartsu jarraitzen dugu; Hendaiako Sokoa enpresan, kasu. Hain justu, LABek bosgarrenez irabazi ditu hauteskunde sindikalak bertan. Lehen kolegioko 16 ordezkarietatik 12 izango dira LABekoak eta bigarren kolegioko 4 ordezkarietatik, 3. Gehiengo zabala, beraz.

Horrenbestez, LAB emaitza oso onak lortzen ari da Ipar zein Hego Euskal Herrian, azken urteetan osatutako ibilbidearen harira. Lan baldintzak bakarka inposatu nahi dizkiguten garaiotan, LABek irtenbide argia proposatzen du: kolektiboki erantzutea. Izan ere, eskubideak lortzeko elkartasuna eta antolakuntza da gure alternatiba.
 

 

 

AZKEN ALBISTEAK | ÚLTIMAS NOTICIAS

Bidelanen hitzarmen kolektiboa sinatzea #LortuDugu

2023ko urtarrilean hasi zen negoziazioaren ondoren, Bidelan AP8n hitzarmena sinatu dugu 4 urterako, 2023/2026rako, LAB buru duen batzordearen eta Bidelan enpresaren artean.

Zaintza, enplegua eta ondasunaren banaketa aldarrikatu ditugu Gasteizen, Martxoaren 3ko sarraskiaren 48. urteurrenean

Ekitaldia egin du LABek Gasteizen, Martxoaren 3ko sarraskiaren 48. urteurrenean, Enbor beretik sortuko dira leloarekin. Garbiñe Aranburu koordinatzaile orokorrak adierazi du 1976 hartan jaio berria zela sindikatua: “Hasieratik argi izan genuen gure lekua non zegoen. 76ko martxoaren 3aren parte izan ginen eta LABentzat urtemuga garrantzitsua izaten jarraitzen du”.

Natra Oñatin aurreakordioa #LortuDugu

Natra Oñatin aurreakordioa lortu dugu. 2022tik hitzarmena berritu gabe pasa eta gero, 2023 osoa negoziatzen egon ondoren, eta enpresaren aldetik mespretxua besterik jaso ez dugun honetan, gaur, 2024ko martxoaren 1ean, aurreakordio bat sinatzera iritsi gara bi aldeak.