LABek ospitaleko zuzendaritzaren kudeaketa kaskarra salatu nahi du. Jakin izan dugu urgentziak eta ospitalizazioa ez direla martxan jarriko agindutako datetan, baizik eta lehenengoa, gutxienez bi hilabeteko epean eta bigarrena, uda pasatu arte.
Aipatutako zerbitzuek martxan egon behar zuten 2016ko azaroaz geroztik. Oraingo atzerapen hau are larriagoa da, zerbitzu horietan lan egin behar zuten langileak bertan baitaude jadanik dena prestatzen, baina ez euren lanpostuei dagokien ordutegi zein txandetan. Langile horietako batzuek euren jatorrizko lanpostuetara bueltatu beharko dute momentuz, eta gainontzekoak ospitalean geldituko dira, baina artatzeko publikorik gabe eta haien kartelera egin gabe.
Hau langile zein erabiltzaileoi adar jotze hutsa baino ez da. Aurreikuspen falta guztiz salagarria da eta, batez ere, sindikatuok pairatu behar dugun informazio falta, ez baitzaigu ezer komunikatu. Gure aldetik, urgentziazko bilera exijitu diogu zuzendaritzari, azal ditzaten atzerapen zergatiak eta langileei (euren lanpostuetan hasi baino lehen dagoeneko haserre dagoen plantilla hain zuzen ere) eman beharreko irtenbideak. Ostegunerako, martxoak 23, ospitalean bertan egingo dugun asanblada batera deitu ditugu bertako langileak.