Asteburuan zerbitzuko guardia-burua Garberako suhiltzaile-etxeko bere bulegotik kanporatua izan zen.
LABetik Garberako suhiltzaile-etxean gertatutakoa salatzen dugu, onartezina baita Gipuzkoako Foru Aldundiko EAJ/PNVko diputatua den Irune Berasaluze eta Donostiako udaleko EAJ/PNVko Martin Ibabe zinegotziaren arteko suhiltzaileen inguruko kontraesanek herritarren kaltetan jokatzea.
Joan den irailaren 4an, ostiralean, Gipuzkoako Foru Aldundiko suhiltzaile zerbitzuko guardia-burua, bere lan-ordutegian zegoela, Donostiako Garberako suhiltzaile-etxean zuen bulegotik kanporatu zuten. Bulegoa uztera behartu zuten. LABek oso larritzat jo du gertatutakoa, eta langile guztien aurrean argi eta garbi salatu du.
Garberako suhiltzaile-etxea Donostiako suhiltzaile zerbitzuaren egoitza da. Eraikina sortu zenean, Gipuzkoako Foru Aldundiak ekonomikoki lagundu zuen, eta garai hartan mahai gainean zegoen Gipuzkoa 20-30 proiektuaren baitan —bi suhiltzaile zerbitzuen bateratzea helburu zuena—, Aldundiko suhiltzaile zerbitzuak bertan kokatu zituen bere komunikazio-zentroa eta guardia-buruaren bulegoa. Ez zen kasualitatea izan. Bi zerbitzuak fisikoki toki berean egoteak koordinazioa, informazio-trukea eta larrialdien aurrean erantzun eraginkorragoa bermatzeko helburua zuen.
Horregatik, LABen ustez ulertezina da orain kontrako norabidean doan erabaki hau hartzea. Are gehiago, guardia-burua larrialdi egoeretan eta, bereziki gauez, erabakiak eta koordinazio-lanak egiteko ardura duen pertsona dela kontuan izanda.
Langile bat bere lanpostutik kanporatzea, eta Gipuzkoako larrialdi zerbitzuko arduradun nagusia koordinazioaren erdigunetik ateratzea, ez da arazo pertsonal bat. Guztiontzako eta, batez ere, herritarren segurtasunerako arazoa da.
LABen ustez, erakundeen arteko desadostasunek edo kudeaketa politikoaren ezintasunak ezin dute larrialdi zerbitzuen funtzionamenduan eragin. Herritarren segurtasunarekin ezin da jolastu.
Horregatik, LABek:
– Gertatutakoaren erantzukizunak argitzeko eskatzen du.
– Erabaki honen atzean dauden arrazoiak langile guztiei azalduak izan daitezela exijitzen du.
– Gipuzkoako suhiltzaile zerbitzuen arteko koordinazioa bermatzeko neurriak har daitezela eskatzen du.
– Eta egoera bideratzeko gaitasunik erakutsi ez duten arduradun politiko eta teknikoek beren erantzukizunak har ditzatela exijitzen du.
LABek ez du onartuko larrialdi zerbitzuen antolaketa eta funtzionamendua erakundeen arteko gatazken menpe egotea. Guztion artean defendatu behar dugu Gipuzkoako suhiltzaile zerbitzu publiko, koordinatu eta eraginkorra eta EAJ/PNVk ere bere ardurak har ditzan exigitzen dugu.